توركلرده داش اينانجي
وئبلاگچی : خــــزراوغلي
+0 به يه ن
Türklərdə daş inancı
ايلك انسانين نئجه يارانديغي، يئر اوزونه هاردان گلديگي، مختلف خالقلاردا و اينانجلاردا فرقلي شكيللرده روايت اولونورسا، اونون، ايلك سيرداشينين داش اولدوغو بوتون خالقلارا بلليدير. انسانين ياشاييشي بلاواسطه داش ايله باغلي اولموشدور. ايلك انسان اؤزونو وحشي حيوانلار، طبيعي بلالاردان، ايستي-سويوقدان قوروماق اوچون داغلارين، قايالارين و بؤيوك داش سلسلهلرينين گؤودهسيندهكي اويوقلارا، ماغارالارا سيغينميشدير. سونرالار همن كاهالاردان، ماغارالاردان چيخان انسان، همن داشلاري و قايالاري اؤزونه آتا، آنا، جدّ يا دا يارادان قوّه حساب ائتمشدير. و حتّي داغي، قاياني انسان كيمي تصوّر ائتميشدير. ائله بونا گؤره ده، داغين باشي، داغين دؤشو، داغين آياغي، داغين يالي، داغين اتهيي و س. سؤزلر ديليميزده قالماقدادير. ايلك انسانين ياتاغي قوروناجاغي داش كاها، داش قايا اولماقلا برابر ايلك سيلاحي دا داش اولموشدور. ايلك انسانلار قيدا الده ائتمك اوچون حيوانلارلا چنگهلهشير و اونلاري اوولاماغا چاليشيردي، لاكين الي يالين انسان وحشي حيوانلارين قارشيسيندا عاجز قاليردي. او دوشوندو كي، همن حيوانلارا قارشي سيلاحا ساريلماليدير. يانار داغلاردان پوسكورن ارينتيلرين، دونموش شكلي اولان «سونگر داشي» (سنگ آذرين) بشر ائولادينين ايلك سيلاحي اولدو. سونگر داشي كسگين و ايتي اولدوغو اوچون هوندور بويلو و گوجلو حيوانلاري راحاتليقلا يارالاييب و اونلارين اؤلومونه سبب اولوردو. ايلك دفعه همن داشلاردان اوو سيلاحي كيمي استفاده ائديب اؤزونه قيدا الده ائدن انسان، داشدا اولاغاناوستو بير گوج و قدرته ايناندي. انسانين فيزيكي گوجو، هابئله قولو، يومروغو و ديرناقلارينين باجارماديغيني، داش باجارا بيليردي. ائله بونا گؤره ده ايلك انسان داشي مقدّسلشديريب بعضاً توتم قاتينا قالديردي. بلكه ده داش اينانجينين قديمليگي، آغاج و حيوان اينانجيندان قاباقكي دؤورلري احاطه ائدير. انسان كسگين سونگر داشلاريني آغاج بوداقلاريلا بيرلهشديريب يئني سيلاحلاري او جملهدن داش بالتاني، ايلكين سونگو و معيّت كسيجي آلتلري ياراتدي. ايلك انسان همن دؤورده داشلاري يونمور و زاغلانماميش فورمادا استفاده ائديردي. يئرسيز دئييلدير كي تاريخچيلر، تقويم و زامان اؤلچوسو اولمايان قديم تاريخي دؤورلري داش دؤورو دئيه آدلانديريرلار. 1- قديم داش دؤورو (پالئوليت) 2- مئزوليت (اورتا داش دؤورو)3- نئوليت (يئني داش دؤورو). غريبه گؤرونسه ده داش، بشر تاريخينده، تاريخ باشلانقيجي و تقويم و زمان گؤستريجيسي ده اولموشدور. [1] دئديگيميز كيمي ايلك انسان داغي، داشي، اؤزونه سيغيناجاق، آتا، آنا، جدّ حساب ائتميشدير. همن انسانلارين اينانجيندا داش مقدّس ايدي و اونا توخونماق، سؤيوش وئرمك اولمازدي. بلكه ده انسانلارين ايلك تانري سايديغي و عبادت ائتديگي ده داش اولموشدور. بير چوخ ابتدائي انسان قبيلهلرينين ايناجينا گؤره، داغلار و قايالارين ايچينده آتا-آنا روحو يئرلهشيردي. انسان بوتون مقدّسلري، دوشونجهسينده تانري اوبرازيني دا داشدان ياراتدي. او تانرينين سيماسيني، سئوديگي بير حيوان و يا دا معيّن جانلي وارليقلار فيقوروندا ياراتدي. ايلك انسان تفكّرونده داش ابديدير، اؤلمزدير. داشلار حاققيندا بير كيتاب دولوسو شعر يازان مرحوم شاعريميز عليآغا كورچايلي بو مسئلهيه گؤزل توخونموشدور. او شعرلرينين بيرينده بئله يازير:
اؤزونو درك ائديب دويدوغو گوندن
انسان طالعيني داشا باغلاييب
تشنه دوداق اوچون آخيب دريندن
بولاغين گؤزويله داشلار آغلاييب
هله عمر ائدنده ماغارالاردا
انسانا داش بالتا سيلاح ساييليب
دئييرلر نه قدر ائلده، دياردا
داشا يامان دئمك گوناه ساييليب
آذربايجاندا ياشايان ايلك انسانلار، داشين ابدي و قالارقي اولدوغونو درك ائديب ياشايش طرزلريني، آرزي- ورازلاريني، حتّي اوو مراسملريني، اوو حيوانلاينين بير چوخ حصّهسيني قوبوستان قايالارينا حكّ ائتميش و گلهجك نسيللره بير سالنامه كيمي ميراث قويموشدور. اونلار داشين ابدي اولدوغونا اورهكدن اينانيرديلار. اسكي توركلرده، داشلار، قايالار، «اوترو»نو «اوچرو»يا[2] عكس ائتديرن بير گؤزگو حساب ائديليردي. . اوغوزلاردا مزارا و قبير داشينا «سين» دئييليردي. اوغوزلارين «سين» سؤزو چوواش توركجهسينده انسان، جان، آدام دئمكدير. ائله بورادان دا بللي اولوركي، آتالارين مزار داشلاري و يا داقبيرلرينين باشيندا اوجالديلان هيكللر مزاردا ياتان كيمسهنين روحونون ياشاديغي يئر كيمي اينانيلير. چيندن آوروپايا قدر اوزانان بو بؤيوك جغرافيادا هر يئرده بير بالبال داشي، بنگو داشي و يا داايري حجملي مزار داشي، قوچ داشي، آت هيكلي وارسا تورك خالقلارينين اولو بابالارينا عاييددير. علم عالمينه بلليديركي، ايران خالقلاري آراسيندا دفن مراسمي اولماميش و آتالار مزارينين مقدّس اولدوغو قيد اولونماميشدير. قديم ايران خالقلاري اؤلن آدامين جسديني بعضا يانديرير، بعضا ده پارچالاييب اوجا داغلار باشيندا قوزقونلارا يئم ائديرديلر. عرب و اسلام دونياسيندا دا دفنه و آتالار مزارينا بير او قدر قيمت وئريلميردي. اسلام اينانجيندا داشدان دوزلن هر بير شئي فيتيش (بت) حساب ائديلديگينه گؤره هيكلتراشليق و رسّامليق دا ياساق (حرام) ائديلميشدير.
آذربايجان - تورك تاريخينده داش او قدر اهميّت كسب ائتميشدير كي، آنتروپونيميكاميزا (آدلار سيستمي) داخيل اولموشدور. علامتدار بير وضعيّتده دوغولان اوشاقلار، بؤيوك سركردهلر، قهرمانلارا داش ايله باغلي آد قويولموشدور. تيمورتاش (دمير داش)، بكتاش (برك داش)، آلتونتاش (قيزيل داش) آدلاري ادّعاميزا بير اؤرنك اولا بيلر.
اسكي توركلرده داش، مقدّس و سِحيرليدير. داش، ابديّت سيمبولو اولماقلا برابر، معيّن خستهليكلرين درمانيندا دا استفاده ائديليردي. يئري گلميشكن قيد ائدك كي، ساير تورك خالقلاريندا اولدوغو كيمي آذربايجاندا دا داشلارين آغري - اذيّتي يوخ ائتمهسي و خستهليكلره درمان ائتمك قوّهسينه ماليك اولدوغونو اينانيلير. داش پيرلري هله ده اوشاق آرزو ائدن سونسوز قادينلارين سيغينديغي يئرلردير. بو گون اوجقار اولمايان كندلر و قصَبهلرده بئله اوشاغي اولمايان قادينلار، داشقوچلارين آياقلاري آراسيندا كئچمكله اوشاق صاحيبي اولاجاقلارينا اينانيرلار. بعضي يئرلرده ايسه دوغمايان قادينلار، قايا اوزَرينده ياتماقلا بويلو اولاجاقلارينا اينانيرلار. آذربايجان بعضي كندلرينده اوشاقلاري تئز يئريمهسي، خستهليكلردن قورونماسي، سوموكلرينين بركيمهسي اوچون قايالارين آلتيندا قارا رنگلي داشدا دوزَلديلميش آت هيكللرينين قارني آلتيندان كئچيريرلر. بير سيرا يئرلرده ايسه قاپينين باشينا مختلف رنگلي و مختلف جنسلي داشلار آسيلير.
داش ايله باغلي او قدر اينانج وار كي دئمكله قورتارماز، داش حاققيندا آرتيق معلومات الده ائتمك ايستهين اوخوجولارا، اورحان حنچرلي، اوغلونون دونيا اينانجلاري سؤزلويو، ميرعلي سيداوفون، آذربايجان خالقينين سوي- كؤكونو دوشونركن، قام –شامان و اونون قايناقلارينا عمومي باخيش، جلال بَيديلينين تورك ميتولوژيسي انسيكلوپئديك سؤزلويو و كاشغرينين ديوان لغاتالتّرك اثرلرينه مراجعت ائتمهلريني مصلحت بيليريك.
تبريز: حسن اوموداوغلو
قايناقلار:
1: دونيا اينانجلار سؤزلويو اورهان هنچرلياوغلو
2: تورك ميتولوژيسي انسيكلوپديك سؤزلويو جلال بَيديلي
3: قام- شامان و اونون قايناقلارينا عمومي باخيش ميرعلي سيداوف
4: آذربايجان خالقينين سوي كؤكونو دوشونركن ميرعلي سيداوف
5: ديوان اللغاتالترك محمود كاشغري
6: شامانيزم تاريخده و بوگون عبدالقادر اينان
[1] - بنگو سؤزو، سونرالار منگو كيمي ايشلنميشدير. معناجا اؤلمز و ابدي دئمكدير. همن سؤز، فارس ديلينه مينگو و مينو كيمي داخيل اولموشدور. قديم سنسكريت سؤزو اولان بهشت سؤزونه صفت كيمي آرتيريلميشدير. سونرالار بهشت سؤزونه صفت كيمي آرتيريلان بو سؤز (بهشت مينو) مجازي اولاراق بهشت معناسيني كسب ائتميشدير.
[2] - قديم توركجهميزده
http://hunmurunu2.arzublog.com/post-47169.html