آذربايجاندا ياشاميش قديم تورك طايفالاري

وئبلاگچی : خــــزراوغلي

+0 به يه ن

ائراميزدان اول 3-جو مين ايلليكدن اوزو بري

   تاريخي قايناقلار قديم آذربايجان اراضيسينده ايسلاما قدر بير چوخ دؤولتلرين قورولدوغونو، اونلارين بعضيلري‌نين حتّي ايمپئرييا سويييه‌سينه گليب چاتديغيني ثوبوت ائدير. ان قديم يازيلي منبعلره اساسن ائ.أ. 3-2 مين‌ايلليكده موعاصير آذربايجان تورپاقلاري‌نين گونئي حيصه‌سي شومئر-آككاد جوغرافيياسي‌نين تركيبينده ايدي. آذربايجان اراضيسينده‌كي  ايلك طايفا بيرلشمه‌سي تونج دؤورونون آخيرلاريندا يارانميشدير. كور-آراز مدنيتي ايسه قديم آذربايجانليلارين هله او واختلار، يعني ائرادان اول 2. مين‌ايلليكده اكينچيليگي موكمّل بيلديگيني آشكارا چيخارير. 

  گونئي آذربايجان ايله اونا قونشو اولان تورپاقلاردا ياشاميش طايفالارلا باغلي ايلك يازيلي منبعلر ائ.أ. 25-23 عصرلره عاييددير و اونلار اورمييه بؤلگه‌سينده آككادجا يازيلميشدير. آنجاق آذربايجان تورپاقلاريندا تورك حاكيميتي ائ.أ. 4 مين ايل اوللره گئديب چيخير. منبعلرده خوصوصيله آراتتاليلار، قوتلار (قوتيلر)، لوللوبيلر و خورريلر حاقدا معلوماتلار واردير. آنجاق علمي منبعلره اساسن گونئي آذربايجان تورپاقلاريندا يارانميش ايلك تورك دؤولتي آراتتادير. آراتتاليلارلا باغلي معلوماتلار شومئر داستانيندا قئيد اولونموشدور. شومئر حؤكمداري مئركار ايله آراتتا حؤكمداري سۇكوشسيراننا آراسيندا حاديثه‌‌‌لر همين داستاندا عكس ائديلميشدير. 

  آراتتا دؤولتي ائ.أ. 3. مين‌ايلليگين بيرينجي ياريسيندا مئيدانا گلميشدير. اونون تورپاقلاري اورمييه گؤلونون گونئي و گونئي-شرق حيصه‌سيني احاطه ائديردي. موعاصير زنجان-قزوين اراضيسي ده آراتتانين آشاغي سرحدلرينده ايدي. 

  آراتتا اهاليسي قيزيل، گوموش، قورغوشون، ميس، داغ داشي و قييمتلي لاجيورد رنگلي داشدان زينت اشيالاري ايستحصال ائديرديلر. اونلار ايستحصال ائتديكلري اشيالاري ايكي چاي آراسيندا حؤكمران اولان شومئر دؤولتينه ايخراج ائديرديلر. 

  ائ.أ. اوچ مين‌ايلليگين ايكينجي ياريسيندا شومئر شهر دؤولتلري سوقوطا اوغراديلار. اونلار ائ.أ. 24-22 عصرلرده آككاد دؤولتي‌نين حاكيميتينه تابئع اولدولار. او واختلار آراتتا دؤولتي ده اؤز عؤمرونو باشا وورموشدو. بو واختلاردا اورمييه گؤلونون گونئي حيصه‌سينده لوللوبو (لوللوبي) طايفالاري‌نين ايتتيفاقي ياراندي. لوللوبولاري تاريخ صحنه‌سينه سۇ و تۇرۇككي طايفالاري چيخارميشدي. بو طايفا دؤولتي‌نين يارانماسي ائ.أ. 23. عصرده رئاللاشدي. 

  لوللوبولار مالدارليق و دئم اكينچيليگي ايله مشغول ايديلر. اونلار دا آراتتاليلار كيمي شومئر مدنيتي‌نين گوجلو تاثيرينده قالميشديلار. ميخي يازيني بيليرديلر، آككادلارلا علاقه  ساخلايا بيلن ميرزه‌لري واردي. 

  واحيد لوللوبو دؤولتي ائ.أ. 2. مين‌ايلليكده پارچالاندي و يئرينده خيردا حاكيميتلر ياراندي. 

  قوتي طايفا بيرلشمه‌لري 

  ائ.أ. 3. مين‌ايلليكده اورمييه گؤلونون غرب و گونئي-غرب بؤلگه‌سينده قوتي طايفا بيرلشمه‌لري مؤوجود ايدي. اونلار همين مين‌ايلليگين ايكينجي ياريسيندان سونرا دؤولت كيمي بيرلشديلر. قوتيلر شومئرلرله موتتفيق اولموشدولار؛ لاكين آككادلارين ايشغالچي سياستينه ده كسكين اعتيراض ائديرديلر. 

  سارقونون نوه‌سي اولان آككاد حؤكمداري نارامسين (نارام-سۇئن) (ئ.أ. 2236-2201) اورمييه بؤلگه‌سينده ياشايان طايفالارا قارشي تجاووزو گوجلنديردي. بوردا ياشايان 70 طايفانين باشچيسي دا بيرلشيب حربي ايتتيفاق ياراتديلار. بونونلا دا آككاد اوردولاريني مغلوب ائتديلر. قوتيلرين حؤكمداري انريداوازيرين( (Ənridavazir باشچيليغي ايله نارامسين اؤلدورولدو و اونلار يوروشه كئچه‌رك گونئي مئسوپوتامييايا داخيل اولوب شومئرلرين موقدس شهري نيپپورو اله كئچيرديلر. تخمين ائديلير كي، بو حاديثه‌‌دن سونرا قوتيلر يئنيدن اؤز تورپاقلارينا - شرقي آنادولو و جنوبي آذربايجانا قاييديب بورالاردا قونشولوقلاريندا اولان لوللوبيلرله توققوشوبلار. 

  قوتي دؤولتي بوي بيرلشمه‌لريندن يارانميش بير دؤولت ايدي. اونون تركيبينده سوبار، توروك، كومان، بارس، بؤري، قارقار، آذر، زنگي و س. تورك بويلاري ايشتيراك ائديرديلر. منبعلر يازير كي، قوتيلر ائ.أ. 23. عصرين نهايتينده مئسوپوتامييادان قووولموشلار. اونلارين حاكيميتي 91 ايل 40 گون چكميشدير. قوتي دؤولتي‌نين ان بؤيوك خوصوصيتي اونون دئموكراتيك اساسلارلا ايداره ائديلمه‌سي ايدي. قونشولوقدا ياشايان دؤولتلرده حاكيميت آتادان اوغولا كئچيردي؛ لاكين قوتيلرده حاكيميتي  " ائل "  آغساققاللاري‌نين و  " ائل "  بيلري‌نين ايشتيراك ائتديگي مجليس سئچيردي. قوتي ائلي‌نين پايتاختي اينديكي كركوك (ارراپها) شهري ايدي. 

  آككاد يازيلاريندا آدلاري چكيلن قوتي ائل‌بيلري‌نين بعضيلري‌نين آدلاري: يارلاقاب، يارلاقاش، يارلاقان، سارلاقاب، ائلۇلۇ(مئش)، اينيم-آباقئش (قئيد: اورخون-يئني‌سئي آبيده‌لرينده كول‌تيگينه  " اينيم كول‌تيگين "  كيمي موراجيعت اولونوب)، كۇرۇم، تيريكان. معلومدور كي،  " قۇت "  سؤزو تورك ائتيمولوگيياسيندا  " حؤكمرانليق، اوغور، جان، روح "  كيمي معنالاردا ايشله‌ديلير و 553-جو ايلده حاكيميتده اولان آوار (تورك) حؤكمداري‌نين آدي كوتي-خان اولموشدور. قوتيلرين توركلوگونو ثوبوتا يئتيره‌جك او واختدان قالميش بو جور بير چوخ دليلي تاريخي منبعلردن گؤسترمك اولار. 

  آككاد حؤكمداري نارامسي‌نين كيتابه‌لري‌نين بيرينده لوللوبيلر باره ده معلوماتلار واردير. لوللوبي حؤكمدارلاري‌نين اؤزلرينه مخصوص ايلك يازيلي آبيده‌لري ائ.أ. 23. عصره مخصوصدور. سارينۇل آدي وئريلن يئرده قايايا حك اولونموش كرال آنوبانينييه مخصوص كيتابه اساس كيمي گؤتورولرسه، لوللوبي تورپاقلاري‌نين اورمييه گؤلوندن توتموش بصره (كنگر) كؤرفزينه كيمي گئديب چيخديغي آيدين اولور. 

  شومئر منبعلري تصديق ائدير كي، خورريلرين وطني گونئي قافقاز، وان گؤلو اطرافي و شيمالي زاقروس بؤلگه لريدير. شومئر منبعلرينده اونلارين ساحه‌‌‌لره  " خۇررۇم "  دئييلير. 

  خورريلرين ائ.أ. اوچ مين‌ايلليگين نهايتينده يازي و يازيلي منبعلره ماليك اولدوقلاريني دليل كيمي قبول ائده‌رك اونلاري شومئر، آككاد و ائلاملارلا ياناشي اؤن آسييانين دؤردونجو بؤيوك و مدني خالقي كيمي قلمه وئرنلر واردير. تاريخي فاكتلاردان نتيجه‌يه گلمك اولار كي، ميتانني دؤولتيني خورريلر ياراتميشلار. ميتاننيلرين ايسه تورك نسليندن اولدوغو قطعيدير. حتّي اورمييه گؤلو بير مودت مانتيانا آدييلا ياد ائديلميشدير. اورمييه گؤلو اطرافيندا كاششۇ (كاسسيت) خالقي‌نين دا ياشاديغي منبعلرده قئيد اولونموشدور. 

  گونئي آذربايجانداكي تورك طايفالاري 

  گونئي آذربايجانين ان قديم خالقلاريندان بيري توركلردير كي، نارامسينه قارشي بيرلشن 17 حؤكمدارين ايچينده اونلارين ايللۇشومئل آدلي حؤكمداري‌نين دا آدي واردير. توروككيلرين ياشاديغي جوغرافييا اورمييه گؤلوندن توتموش زنجانا كيمي گئديب چيخير. توروككيلر تاريخ صحنه‌سينده قوتتيلر و اوللوبيلرله عئيني واختدا چيخيش ائتميشلر. 

  ائ.أ. 3. مين‌ايلليگين آخيري و 2. مين‌ايلليگين اوللرينده موعاصير آذربايجان تورپاقلاريندا ياشاديغي تخمين ائديلن طايفالارين و ديگر ائتنوسلارين ديللري زاقر-ائلام، زاقروس، كاسپي و س. آدلار وئريلن بؤيوك ديللر قروپوندا بيرلشيرلر. بعضي عاليملر شيمال-شرق قافقاز ديل قروپونا منسوب اولان ناه-داغيستان ديل قروپونون خورري و اورارتو ديللري ايله قوهوملوغونو ايره‌لي سورورلر. 

  اورمييه گؤلو حؤوزه‌سينده ائ.أ. 3-2. مين‌ايللرده سوبارلار دا ياشاييرديلار. سوبارلار نينكي آذربايجان خالقي‌نين، بير چوخ تورك خالقلاري‌نين فورمالاشماسيندا ايشتيراك ائتميشلر. سوبارلار ايكي چاي آراسيندا (دجله-فرات) ياشاييرديلار و سونرادان بورا گلن سامي طايفالاري آككاد شهر دؤولتي اطرافيندا جمعلشديلر و اونون گوجلنمه‌سينه عاميل اولدولار. آككاد كرالي سارقون ائ.أ. 24. عصرده يوخاري سوبار بؤلگه‌سينه هوجوم چكدي و سوبارلاري سيخيشديردي. 2. مين‌ايلليگين اوللرينده آرتيق سوبار تورپاقلاريندا آسور حاكيميتي گوجله‌نيردي. يوخاريدان آككاد، شيمال-شرقدن خورري، آشاغيدان سامي-آسور طايفالاري‌نين هوجومونا معروض قالان سوبارلار غرب، اورتا و شرق اولماق اوزره اوچ قولا آيريلديلار. 38-جي پارالئل بويونجا غربه اوز توتان سوبارلار او اراضيلرده ياشايان خالقلارين ايچينده اريييب گئتديلر. همين ايستيقامتده اورمييه گؤلو حؤوضه‌سينده مسكونلاشانلارين بير خئيلي حيصه‌سي سيبير و توركوستان طرفه اوز توتدو. سيبيرين آدي دا سوبارلارلا باغليدير. اورتا حيصه ده قالان سوبارلار دجله و فراتين يوخاري حيصه‌سينده، وان گؤلونون غربينده اينديكي بيتليس ايله ديياربكير آراسيندا هر بوي بير ماحالدا اولماق اوزره مسكن سالديلار. همين واخت بورالار خورريلرين ياراتديغي موتانني دؤولتي‌نين حاكيميتينده ايدي.  

  13. عصرده ميتانني دؤولتي داغيلديقدا سوبارلارين آرمئ، اورمو، كولمئري، تورخو و ديگر يئرلرينده آيري-آيري بَيليكلر ياراندي. اونلار آسور و تزه يارانان اورارتو دؤولتينه قارشي دؤزوم گتيره بيلمك اوچون بيرلشيب سوبار بيليگيني قوردولار. سوبار دؤولتي ائ.أ. 673-جو ايله كيمي اؤز موستقيلليگيني قورويوب ساخلايا بيلميشدير. 

  قارقار طايفالاري

  آلبانلاردان سونرا آذربايجاندا گئنيش اراضيلرده مسكونلاشميش اساس طايفالاردان بيري قارقارلار ايدي. قارقارلار چوخ قديم ائتنوسدور. منبع اولماديغيندان اونلارين شيمالي قافقازدان آلبانييا اراضيسينه نه واخت ائنديكلريني سؤيله‌مك چتيندير. كالانكاتوكلو مويسئي قارقارلارين ماكئدونييالي ايسكندر دؤوروندن آلبانييادا ياشاديغي باره ده معلومات وئرميشدير. لاكين قديم تورك طايفالاريندان اولان قارقارلار حاقيندا ائ.أ. 1. مين‌ايلليگين باشلانغيجيندا يارانميش  " ايليادا "  اثرينده معلومات وار:  " هومئر  " ايليادا " دا ايدي داغيندا قارقار زيروه‌سي‌نين و داردانئل بوغازيندان آزجا آراليداكي قارقار شهري‌نين آدلاريني چكير " . (13؛ 30-31) 

  قارقارلار كومپاكت حالدا ياشاميشلار. اونلار آلبانييانين اساس طايفالاريندان ايديلر؛ كورون آشاغي طرفينده، آرتساكدا، آلبانييانين شيمال-شرقينده، عئيني زاماندا جنوبي آذربايجاندا، شيمالي قافقازدا و اينديكي ائرمنيستان اراضيلرينده ياشاييرديلار.  

  خورئنلي مويسئي قارقار ديلينده بوغاز سسلري‌نين چوخ اولدوغونو گؤسترميش، قارقار ديليني  " باربار ديلي "  آدلانديرميشدير. قارقارلارين تورك منشالي طايفا اولدوغونو ثوبوت ائدن ان موهوم دليللردن بيري يالنيز آذربايجاندا، ايراندا، شيمالي قافقازدا دئييل، بوتون مركزي  آسييادا بو طايفانين سون درجه گئنيش ايز قويماسيدير.  

  باشقا تورك طايفالاري كيمي، قارقارلار دا واختيله اؤن آسييادان شيمالا و شرقه ياييلميشلار. و.و.بارتولد قئيد ائدير كي:  " قارقارلار عئيني آدلي قيرغيز داستاني‌نين افسانوي قهرماني ماناسين بابالاري ايديلر "  و قيرغيز ائپوسو  " ماناس " اين قهرماني ماناسين خالقي دا قارقار و يا قيپچاقلار ايدي. (14؛ 541) آذربايجان اراضيسينده قارقار توپونيملري چوخدور.  " قارقار "  و يا  " كاركار "  توپونيمي گئنيش ايشلنمه آرئالينا ماليك اولموشدور.5. عصرده قارقار ديلي اوچون اليفبا ياراديلماسي حاقيندا معلومات دا وار. 

  سامي طايفالاري ائ.أ. اوچ مين‌ايلليگين اوللرينده فرات و دجله چايي‌نين شيمال طرفينده مسكونلاشديلار. آري منشالي اهمه‌ني دؤولتي‌نين سياسي نوفوذو قافقاز داغلارينا چاتديقدا قوزئي آذربايجاندا ياشايان طايفالار آرتيق تاريخ صحنه‌سينده گؤرونمه‌يه باشلاديلار. اونلارين ان گؤركمليسي كاسپيلردير كي، خزر دنيزي‌نين بير آدي‌نين دا كاسپي اولماسي اونلارين ياديگاريدير. كاسپيلر قديم زامانلارين گوجلو خالقلاريندان بيري اولان كاسسيلرين قوهومودورلار. اونلار ائ.أ. 1. مينيلين سونوندا آلبان طايفالاري آراسيندا أريييب گئديبلر. اونلارين ياشاديغي جوغرافييا موغان-لنكران اوواليغي اولموشدور. كاسپيلر گميچيليك صنعتينه ياخشي يييلنميشديلر. 

  بو دؤورلرده آذربايجان اراضيسينده ياشايان قؤوملرين بير حيصه‌سي‌نين توران سيستئمينه داخيل اولدوغونو ايره‌لي سورنلر واردير. 

  كوشي و يا قوشچو طايفاسي 

  آذربايجان اراضيسينده ياشاميش كوشي و يا قوشچو قديم تورك طايفاسي حاقيندا تاريخي قايناقلاردا ماراقلي معلوماتلار وار. آذربايجان توپونيميياسيندا بو طايفانين مسكونلاشماسي نتيجه‌سينده يارانميش بير سيرا توپونيملر مؤوجوددور. 

  ائراميزدان اول 2. عصرده اورتا آسييانين ايالتلري هونلارين هوجوملارينا معروض قالير. هونلار طرفيندن مغلوب ائديلميش و غربه طرف سيخيشديريلميش خالقلار چين منبعلرينده يوستي آدي ايله معلومدور. محض يوْستي سؤزونون ترانسكريپسيياسي تك حالدا كوشي و يا قوشي، جمع حالدا قوشان فورماسيني وئرميشدير. توركوستانين شرقينده‌‌كي  اينديكي تورفان شهري‌نين يئرلشديگي ويلايت ده او زامان قوشي آدلانميشدير. ن.و.پيقولئوسكايا يازير كي، قوشانلارين تركيبينده توركلر ده وار. 

  ق.أ.قئيبوللايئو 19. عصرده آذربايجاندا قوشي/ قوشان/قوشچو واريانتلاريندا 38 توپونيمين اولدوغونو قئيد ائتميشدير. قوشچو توپونيمي‌نين موختليف واريانتلاري قازاخلاردا - قوشي، باشقيرلرده - قوشچو، كوشسي؛ توركمنلرده - قوتچي، قارا نوقايلاردا - قوشسي، قيرغيزلاردا - قوشچو و س. واريانتلاردا شيمالي قافقازدا، اورتا آسييادا، ايران و توركييه‌ده ده ياييلميشدير.  

  تدقيقاتچيلاردان بعضيلري‌نين فيكرينجه، بو توپونيم هون قبيله لريندن اولان قوشانلارين (قارا هونلارين) آدي ايله باغليدير. 

  ايلك دفعه  ن.آ.آريستوو كوشچو طايفاسي‌نين هونلارلا علاقه دار اولدوغونو سؤيله‌ميشدير. م. أ.ولييئوه گؤره، قوشچولار 3-6. عصرلرده آذربايجانا گلميش هونلارين واريثلريدير. اونون فيكرينجه، آذربايجانا 227-جي ايلده گلميش هونلار  " قوشان "  (قارا هونلار) و هون-سابيرلر ايديلر. آبرامسون و أ.حوسئين‌زاده بو ائتنونيمين كؤكونده تورك و آذربايجان ديللرينده كي  كوش (قوش) سؤزونون دوردوغونو و بوتونلوكده ائتنونيمين  " اوولايان قوشلا مشغول اولان "  معناسيني وئرديگيني سؤيله‌ميشدير. لاكين گئنيش آرئاللي قوشچو توپونيملري و قوشچو طايفا آدلاري آيدين گؤسترير كي، اونلارين اوو قوشو ايله هئچ بير علاقه‌سي يوخدور. 

  ن.پيقولئوسكايا يازير كي، كوشانلارين ايچريسينده تورك طايفالاري دا واردي. بونو كوشان چارلاري‌نين يابقو آدلانماسي دا آيدين گؤسترير كي، بو دا  " شاهزاده "  دئمكدير. طبري 9. عصر كوشان چارلاريني  " خوقان "  آدلانديرميشدير. بئله‌ليكله، هم تاريخده، هم ده ديلچيليكده  " آغ قوشو ساخلايان "  شاهزاده  " خوقان "  معنالاريني داشييان بو طايفانين اوغوز يوردوندا اؤزونه‌مخصوص يئري اولموشدور . 

  أ.حوسئين‌زاده ايسه قوشچو طايفاسي‌نين آذربايجانا گليشيني مونقوللارين شيمالي قافقازي آلماسي ايله علاقه‌لنديرميشدير. لاكين أ.حوسئين‌زاده‌نين فيكري اينانديريجي دئييلدير، چونكي 12. عصره عاييد ائرمني منبعلرينده آذربايجان اراضيسينده شيروان، باكان و ب. طايفالار ايله ياناشي قوشي طايفاسي‌نين دا آدي چكيلير. ماراقلي اودور كي، زاقافقازييا توپونيميياسيندا بو ائتنونيم هم قوشي، هم ده قوشچو فورمالاريندا اؤز عكسيني تاپميشدير. آذربايجاندا كوشي ائتنونيم اساسلي ائتنوتوپونيملرين ياييلما آرئاللارينا آشاغيداكي بؤلگه‌لر داخيل ائديلير: قوبا، شاماخي، آغدام، قازاخ، جبراييل، شوشا، قاخ، داش‌كسن. 

  توپونيم و ائتنوتوپونيملر اصل حقيقتي اوزه چيخارير 

  هله محمد حسن ولييئو باهارلي‌نين  " آذربايجان "  اثرينده آذربايجاندا قوشچو طايفا آدي ايله باغلي يارانان آشاغيداكي كند آدلاري چكيلير: گؤي‌چايدا-قوشچي، يئنگيجه؛ قوبادا-كؤهنه قوشچو، يوخاري قوشچو، آشاغي قوشچو؛ شاماخيدا قوشچو؛ آغداشدا - قوشلار؛ جاوانشيرده - قوشلار؛ زنگزوردا - قوشچو بلك، قوشچو، قوشچو تزه‌كند؛ قازاخدا - قوشچو؛ جبراييلدا - قوشچولار؛ شوشادا - قوشچولار، قوشابا. 

  بوندان علاوه ، قاخ رايونونون ايليسو كندينده محض بو ائتنونيم قوشيلر فورماسيندادير. آذربايجان اراضيسينده ياشاميش قوشچو طايفاسي‌نين آدي شاماخي رايونوندا قوشچو داغي‌نين (هوندورلوگو 1421 مئتر) آديندا قالميشدير. رئسپوبليكاميزدا قوشچو داغي داش‌كسن اراضيسينده، قوشچو آيريمي، قوشچو قالاسي داغي (لاچين رايونو، قوشچو كندي) قوشچولار داغي (خوجه‌وند رايونو) قوشچونون يالي گده‌بَي رايونو، گؤي‌ألي كندي اورونيملري و س. قئيده آلينميشدير. 

  اوغوز رايونونون ياقوبلو كندي‌نين جنوبوندا قوشلار آدلي كند خاراباليغي دا واردير. كئچميشده كوبان ايالتينده قوشي خوتورو و قوشي آدلي بير نئچه كند اولموشدور. بوتون بو فاكتلار كوشي‌نين ائتنونيم اولماسينا ثوبوتا يئتيرمكله ياناشي، اونون گئنيش آرئالدا ياييلماسيني گؤسترير. 

  ائرمنيستان اراضيسينده ده كوشي ائتنونيم اساسلي ائتنوتوپونيملر چوخدور. 

  ايروان خانليغي‌نين سورمه‌لي ماحاليندا كند آدي وار. 1878-1832-جي ايللرده آذربايجان توركلريندن عيبارت اهاليسي قووولموش و كند داغيديلميشدير. قديم تورك منشالي كوشي (كوشچو) طايفاسي‌نين آديني عكس ائتديرير. 19. عصرده قافقازدا 38 كوشي و قوشي، قوشچو، قوشيلر توپونيمي واردي. قوشي (قوشچو) طايفاسي 4-3.عصرلرده جنوبي قافقازا گلميشدير. ايلك دفعه   " 7. عصر ائرمني جوغرافيياسي "  آدلي منبعده (6. عصر) خوشي كيمي قئيد اولونموشدور. منشاجه اورتا آسييادا كوشان چارليغيني ياراتميش (1-3. عصرلر) توركلرده قوشچو، فارسلاردا كوشان طايفاسي اورتا آسييا ايران و قافقازدا كوللي ميقداردا توپونيملرده ايز قويموشدور. 

  قوشي-ايروان خانليغي‌نين دره‌له‌يز ماحاليندا كند آدي اولموشدور. 1828-1832-جي ايللردن كندده ائرمنيلر ده مسكونلاشميشديلار. 1918-جي ايلده آذربايجانليلار كنددن قووولموشلار. 1946-جي ايلده كند ائرمنيجه كئجيت آدلانديريلميشدير. يئرلي اهالي ايچريسينده كنده بيلن ده دئييلميشدير. 

  قوشي - ايروان قوبئرنيياسي‌نين ائچميدزين قزاسيندا كند آديدير. قوشي‌دره‌سي - ايروان قوبئرنيياسي‌نين نوووبيازيد قزاسيندا كند آديدير. 19. عصرين سونلاريندان بري آدي چكيلمير. قوشي‌اوغلو مزره‌سي - 1590-جي ايلده روان ايالتي‌نين آباران ناحيه‌سينده كند آدي اولموشدور. 

  قوشچو - گنجه قوبئرنيياسي‌نين زنگه‌زور قزاسيندا كند آدي اولموشدور. 1950-جي ايلده داويدبي قصبه‌سي ايله بيرلشديريلميشدير. 1988-جي ايلده اهاليسي آذربايجانا قووولموشدور. 

  قوشچو - 1590-جي ايلده ايروان ايالتي‌نين كاربي ناحيه‌سينده كند آدي؛ قوشچو - 1728-جي ايلده ايروان ايالتي‌نين مزره ناحيه‌سينده آغجاقالا طرفده يئرلشن كند آدي اولموشدور. قوشجاقايا - گنجه قوبئرنيياسي‌نين قازاخ قزاسيندا ماحال آدي اولموشدور. 20. عصرين 30-جو ايللرينده كوللئكتيولشمه ايله علاقه دار اولاراق كند لغو ائديلميشدير. قوطبي قيشلاغي - 1728-جي ايلده ايروان ايالتي‌نين شيراكئل ناحيه‌سينده كند آدي ايدي. بئيتي - موراد (مورادخان كندي) دا آدلانير. 


قايناق :

   " آزادليق "-ين آراشديرماچي ژورناليستلر قروپو 

  كؤچورن: عباس ائلچين


 " ائلچين " وئبلاگي
http://elchin.arzublog.com/post-52821.html


  • [ ]