اميرالمؤمنين علي( ع ) شهادت گونو تسليت اولسون
وئبلاگچی : خــــزراوغلي
+0 به يه ن
تسليت
ميرالمؤمنين علي عليه السلامين شهادت گونو بوتون انسانليق عالمينه تسليت اولسون
حضرت علي نين (ع) شهادتي بارده نئجه فرقلي روايت
ابن ابي الدنيا (م 281) اوچونجو قرنين محدث و تاريخچي‌سي ايدي كي حضرت علي‌نين (ع) شهادتي باره‌ده مستقل كتاب يازيب. بو كتاب، بو باره‌ده اليميزه چاتان اَن قديمي كتاب ساييلير.
مستقل كتابدان سؤز گئدنده، اوّلدن آخره قدر بير موضوعدا و بوردا امام علي‌نين (ع) شهادتي باره‌ده يازيلان كتاب نظرده توتولور. البته تاريخ طبري و يعقوبي كيمي عمومي تاريخ كتابلاريندا دا بو باره‌ده سؤز يازيليب.
امام علي‌نين (ع) شهادتي باره‌ده يازيلان اثرلر آراسيندا «ابن ابي الدنيا» نين كتابي گونوموزه چاتان اَن قديي كتابدير. هرچند اوندان اوّل‌ده آيري اثرلر واريميش. بو اثرين آدي «امير المؤمنين عليه السلامين مقتلي» دير كي بيرينجي دفعه مرحوم عبدالعزيز طباطبايي طرفيندن تراثنا مجله‌سي‌نين 12-جي نمره‌سينده (1408ق) ياييلدي.
كتابين يازاني ابن ابي الدنيا قرشي‌يه معروف اولان ابوبكر عبدالله بن محمد بن عبيد (208 - 281) تاريخ و حديث زمينه‌سينده عالم ايدي كي حديث و تاريخ زمينه‌سينده مختلف كتابلار يازميشدي.
او، تاريخچي طبري‌دن اوتوز ايل اوّل وفات ائتميشدي.
اونون كتابيندا مختلف تاريخي مأخذلردن نقل اولموش 119 روايت وار. هر بير روايت امام علي عليه السلامين شهادت جرياني باره‌ده بير داستاندير كي زمينه‌لر و طبعاتين‌دا ايضاح ائديب. بو روايتلرين هاميسي «ابن ابي الدنيا»نين ديلي ايله «حافظ حسين بن صفوان برذعي» (م 340) آدلي شخص طرفيندن نقل اولور.
هر خبرين راويلري «ابن ابي الدنيا»دان خبرين اصل منبعينه قدر، نقللرين چوخونون اوّلينده گليب. اونلارين بعضيسي شيعه تاريخچيلري و بعضيسي عامه (سنّي) تاريخچيلريدير. مثال اوچون بو سند: . . . . عن جابر بن عبدالله جعفي، عن محمد بن علي [امام باقر] . . . سونرا امام علي‌نين (ع) وصيّتيني امام مجتبي‌يه (ع) نقل ائديب.
بيرينجي روايت امام علي‌نين (ع) سحر اوّل وقت مسجده يوللانان زماندان يازير كي قوشلار او حضرتين قاباغينا چيخيب اؤتمگه باشلاديلار. اصحاب قوشلاري اوزاقلاشديرماغا چاليشديرديلار آما حضرت بويوردو: «قوومايين! اونلار نوحه اوخورلار».
امام علي عليه السلامين شهادت روايتلري بو كتابدا فرقلي نقل اولوب. طبري تاريخينده اولدوغو كيمي بو كتابدا دا فرقلي و متعارض روايتلر، دال به دال گليب.
حسن بن دينار، حسن بصري‌دن روايت ائدير كي دئدي: او گئجه علي بن ابي طالب دئدي: «انّي مقتول لو قد أصبحت. سحر آچيلاندا من مقتول اولاجاغام».
بو كتابين بئشينجي روايتينده هشام بن محمد كلبي‌نين ديلي ايله بئله گلير: نخع‌دن بير كيشي منه روايت ائتدي كي «صالح بن ميثم بن عمران بن ميثم تمار» آتاسيندان بئله روايت ائتدي: «علي صبح نمازي اوچون ائشيگه چيخدي. نمازين تكبيريني دئدي. سونرا انبياء سوره‌سيندن اون بير آيه اوخودو. بو آندا، ابن ملجم قيلينجلا او حضرتين فرقيندن ووردو. جماعت اونون باشينا تؤكولوب قيلينجي اليندن آلديلار. اونلار نمازدايديلار. علي ركوع‌يه گئتدي سونرا سجده ائتدي. من اونو گؤردوم قان باشيندان آخيردي و او سجده ائديردي. باشي‌نين قاني او طرف بو طرفه تؤكولوردو. يئنيدن ايكينجي ركعته قالخدي آما حالي دَييشدي. قرائتيني آراملاتدي. سونرا اوتوروب تشهد و سلام وئريب مسجدين ديوارينا داياندي».
يئدينجي روايتده بئله گليب: «ابن بجره اشجعي» ايله «ابن ملجم» قرار قويموشدولار قيلينجلا اماما حمله ائله‌سينلر. بيري‌نين قيلينجي سهوه گئتدي و ديوارا دَيدي و ابن ملجمين قيلينجي اصابت ائتدي. اونلارين هر ايكيسي‌ده قاچديلار. ابن بجره كنده‌يه طرف و ابن ملجم بازارا طرف. ابن ملجمي توتوب امامين نزدينه گتيرديلر.
11-جي روايتده بئله گليب: واقعه‌دن ايكي گئجه اوّل، امام مسجده وارد اولوب اورداكيلاري يوخودان اويالديردي. ابن ملجم او حضرتين نزدينه گليب امامي توبه‌يه چاغيران بير مكتوب وئردي. امام او آن اونو اوخويا بيلمه‌دي. نمازدان سونرا آچيب اوخودو. اوندا بئله يازيلميشدي: «سني شركدن توبه ائله‌مگه چاغيريرام». حضرت بويوردو: «بو نامه‌نين صاحبي كيمدير؟» هئچ كسدن جواب گلمه‌دي. امام آغيز سويونو اونا آتيب محو ائديب ائشيگه آتيب بويوردو: «الله‌ين لعنتي اونا اولسون».
12-جي روايتده امام باقر عليه السلامين ديلي ايله بئله گليب: الله تعالي شهادت كرامتيني ابن ملجمين ضربتي ايله امام علي‌يه (ع) نصيب ائتمه‌سي‌نين اراده ائله‌ديگي زمان، ابن ملجم، بني اسد مسجدينده ايدي. هاوا قارالاندا كندي‌لرين ائولريندن بيرينه گئتدي. اوندان بير جمعه اوّل، امام منبره چيخيب بويوردو: «الله پيغمبري (ص) منه بويوردو « لايبغضك مؤمن و لا يحبك كافر» مؤمن سندن غضبلنمز و كافر سني سئومز. و آرتيردي: يوخودا گؤردوم بير شيطان منه ضربه ووروب ساققاليمي باشيمين قانينا ايسلاديب. آما بو مني ناراحت ائتمه‌دي. . .
معهود گئجه‌سي ابن ملجم قاپي يانيندا كمين قوردو. امام نماز اوچون مسجده وارد اولاندا ابن ملجم ضربه‌سيني يئنديردي. محمد بن حنيفه حضرتين ياخينليغيندا دورموشدو. اونو توتدو. جماعت‌ده ابن ملجمه هجوم ائتديلر كي اونو اؤلدورسونلر. امام علي (ع) بويوردو: «دؤزون، اونو اؤلدورمه‌يين. قالسام اونو قصاص ائدرم و يا باغيشلارام. قالمازسام جان، جان مقابلينده».
13-جو روايت عبدالغفار بن قاسم انصاري‌نين ديلي ايله بئله نقل اولوب: نئچه نفردن ابن ملجمين گئجه‌ني اشعث بن قيسين ائوينده ياتديغيني ائشيتديم. ائله او ايدي كي سحر وقتي اونا دئدي: سحر اولدو ! (يعني تئز اول يوبانما !)
همان سحر «بني كنده» مسجدي‌نين اذانچيسي «حجر بن عدي» ايدي. ائله او، مناره باشيندان دئدي: «اعور علي‌ني اؤلدوردو». (ابن ملجم بير گؤزلو ايدي.) سونرا اشعثه خطاباً دئدي: «ابن ملجم سنين يانيندايدي و سن اونونلا پيچيلداشيردين».
91-جي روايتده «زحر بن قيس»ين ديلي ايله بئله گليب: حسن بن علي مني مدائنه گؤندردي كي شهادت خبريني اوردا اولان حسين بن علي‌يه چاتديرام. يئتيشنده حسين بن علي دئدي: «زحر! نييه رنگين آتيب؟» دئديم: «اميرالمؤمنيني بو دنياده حياتي‌نين سون گونونده و او دنياسي‌نين اوّل گونونده ترك ائتميشم. بو حسنين سيزه مكتوبودور». امام سوروشدو: «اونو كيم اؤلدوردو؟» دئديم: «فاسق مارقيندن عبدالرحمان بن مجلم آديندا بني مراددان بير نفر». سوروشدو: «اؤلدورولدو؟» دئديم: «بلي» تكبير دئييب آرتيردي: « انا لله و انا اليه راجعون و الحمد لله رب العالمين، نه بؤيوك مصيبت ! بونونلا كي الله رسولي بويوردو: هر زمان سيزه مصيبت گلسه، منيم مصيبتلريمي يادا سالين كي اوندان يوخاريسي يوخدور. الله رسولي دوز دئدي و بو مصيبت او مصيبتدن سونرا اَن بؤيوك مصيبتدير و من عمرومده اوندان يوخاريسيني گؤرميه‌جگم. سونرا بويوردو: ان البلاء الينا أهل البيت سريع. مصيب بيز اهل بيته طرف سرعتليدير. و الله المستعان. حسين بن علي مدائن جماعتيني ييغيب امام حسنين نامه‌سيني اونلارا اوخودو. بو آندا «عبدالله بن سباء» آدينا تانينان همدان اهليندن اولان ابن السوداء دئدي: «علي‌ني قبرده ده گؤرسم، بيليرم كي ظهور ائده‌نه قدر اؤلميه‌جك. بو آندا جماعتين آغلاشماسي و استغفاري گؤيه قووزاندي و حسين بن علي‌يه تسليت دئديلر و او حضرت جماعتله كوفه‌يه قاييتدي.
قايناق:
حجت الاسلام ميرزه عبدالصمد ملكي
http://www.din-xadimi.blogfa.com/post/683
بو يازيني همده جناب سالاريان وئبلاگيندا گؤردوم كي جناب ملكي وئبلاگيندان كؤچورتموشدولر. گؤزه‌ل شكيلريده توركان خراسان وئبلاگيندان بورايا كؤچورتموشم.
