فلسطين
وئبلاگچی : خــــزراوغلي
+0 به يه ن
سحر چاغي آشيريمدان گون چيخيردي. تورپاق قازماسيندان اه‌ل قاييرما تپه‌جيكلرين قيراقيندان يالقيزجاسينا كئچيرديم. كوره‌گيمده آغيرليق حسسي ائديرديم. توفنگله چانتامي آسداميشديم. ساواشدا عسگرليك چتين ايشدير، اولوم ديريم چاغلاري كئچيريريك. عراقيلار بيزيم ايران تورپاقلارينا باسقين ائدندن بري بوتون ايرانليلار وطندن اوتورو جانيميزدان كئچيريك. گئجه‌ني سحره‌دك كيشيكچي ايديم. ايندي يامانجاسينا يوخوم گليردي. آياقيم بورولدو، يوخولو يوخولو يئره دوشدوم.
گؤز قيپريميندا بير يرتيجي هارانميش هيكللي ايت اوستومه يوگوردي. بوتونلوكله اولومومو دوشونوردوم. اولوم قورخوسو جانيمدا ايدي. داها گؤزوم بيرزاد گؤرموردو.
******
هوشا گلديم گؤزومو آچديم. قارانليق اوتاقدا بير كؤر ائديجي ايشيق گؤزومه ساچيليردي. ائله بيل بير دهشتلي يوخو گؤرموشدوم. اؤزومله دئينديم: - به هاني او ايت؟
ايسته ديم دورام، اولمادي. باغلانميش ايديم. اه‌ل آياقيمي ترپه‌ده بيلميرديم. بوتون جانيمدا يارا دويوردوم. بيرده‌ن بوزلو سو، باش اؤزومه توكولدو ائله بيل چايا دوشموشم. بوغولوردوم. نفسيمي آلمادان، يوموروقلا ته‌پيك ده‌يرديم.
بيري باغيريردي:
- بگو، زود باش بگو. با كيا به تظاهرات آمدي؟ شماها همه چند نفريد؟ رابط شما با آمريكا و اسراييل چه كسايي هستن؟
بير آيري سسله ائشيديرديم:
- فكر نكن قسر در ميري. بالاخره همه چيز و اعتراف ميكني.پان تورك احمق . . .
اؤزومله دوشونوردوم: - بولار كيمديلر؟ مندن نه ايستئيرلر؟ بورا هارادير؟ بيه من نه گوناه ائتميشم؟ من ايندي جبهه‌ده ايديم، مني بودارريان او ايت هاني؟ آلله من اولموشمسه بورا جهنم‌ديمي؟
اه‌ينيم ياش ياش پوتك چارپيسي قولوما ده‌يدي. قولومون سينماسين دويدوم. بيرده هوشدان گئتديم.
* * * * * *
باش بئينيمده مرمي اييي دولموشدي. گؤزوم يومولو، دويوردوم پالتاريم ياشدي. سس ائشيديرديم:
- مئهتي، مئهتي سنه نه گلدي قارداش؟
بيري چاليشيردي مني يئردن قاوزاسين.
- آلله لعنت ائتسين بو عراقيلره. دؤزوملي اول مئهتي. سني اورژانسا يئتيره‌رم. من اولوم آييل‌گينان. آخي نه جواب وئره جيم دده ننوه.
ممدين سؤزونون داواميندا آغلاماقين دوشوندوم، زاريلدئيردي.
ممد : - آلله بو ساواش هاچان قورتاراجاق؟ هامي جاوانلاريميزي اه‌لدن وئرديك. آلله بورا باخئي، باشدان آياقا قان باسيب بئله‌سيني.
آغليا آغليا دئدي:
- حميد تئز اول، بيرليكده قاوزاياق، برانكاوين اوستونه قوياق. بيـــــر، ايكـــــي، اوچ، يا علــــي.
مني برانكاولا قوزاييب وانتين دالينا قويدولار. حميد سؤروشدي:
- بئله سينه تركش ده‌ييب؟ نمه پارتدايب ممد قارداش؟
ممد : - هــر نــــــــه، تئز اول يئتيره‌ك اورژانسا.
سسلر كسيلديكجه منده هوشدان گئتديم.
* * * * * *
گؤزوم آچيلدي. ائوده تئلويزيا قاباقيندا موبل اوستونده يوخوم آپارميشدي.
- نه قورخولو يوخو گؤروردوم. اؤزومدن سؤروشدوم نيه؟
ياديما گلدي فيلمه باخيرديم. فلسطينلي فيلم. بير فلسطينلي يازيچي، اسرايللي لرين اه‌لينده اسير دوشموشدي و اولار اوني ايشكنجه ائديرديلر. پوتكونان قولون سينديرديلار و يازيچينين اه‌ل بارماقلاريني كسديلر.
اسرايللي : - عرب سوسمارخور عوضي، ببينم چطوري ميخواهي افاضات قلم بكني! هاهاها. . .
فلسطينلي سيزيلديا سيزيلديا : - الله اكبر.