فيريلداقچي ممي
وئبلاگچی : خــــزراوغلي
+0 به يه ن
فيريلداقچي ممي
فير سؤزو بيزيم ديلده همده قونشو ديللرينده چوخ ايشلنير. بيزيم ديلده دئملي هامي ديل‌لردن آرتيقراق ايشلنير.
فيرفيرا، فيررانماق، فيرفير توك، فيرچا، فيرتانا و . . .، ائله بيريده فيريلداماق دير.
بيلميم بو سؤز نه جور دوزلينيب. داماق فيررانير يوخسا فيريلدا_يا ماق قؤوشولوب. هله هرنه. بيزيم سؤزوموز بعضي لردن گئدير كي چوخ فيريلداقچيديرلار. هــه، مميش بيلينمز كيمين اوغلو، فيريلداقچي. بيزيم كتده آدين فيريلداقچي ممي قويوبلار. ممي بو آدي قازانديقدان چوخ شخصيتلي گزيردي. بيليردي هله هله هر كيمين آدي ساني اولماز.
دونن يوخ ايسراقا گون كندين مئيدانيندان كئچيرديم، مميشي گؤردوم قيراقيمدان كئچنده سلام وئرديم، سلاميمي آلمادان قاش قاباقلي ميدانين اوباشينا چيخدي. تعجبلنديم، گئتديم دالينجاق، چاغيرديم:
- فيريلداقچي ممي هــــــــــاي!
ممي دؤنوب دالينا باخدي. اوزي گولومسه‌دي. داياندي، من اونا يئتيشجه‌يين اه‌نگه وئردي. ائله بيل سحر سحر اه‌نگ اه‌تي يئميشدي. اوفكه ايله دال بادال دانيشيردي:
- آي لوتو صمد گؤرورسن وفاسيز دونياني؟ گؤرورسن بو حسي هله آياقي كنده يئتيشمه‌ميش فيريلدايا فيريدايا ايستئير منيم آد سانيمي اوغرولاسين؟ بو جاماعاتدا دئميرلر بيري ايل‌لردير چاليشيب اه‌مكله آد قازانيب نيه گره‌ك بيري يئتيشمه‌ميش آدين اوغرولاسين؟ بيليسن نه وار هله يالتاقين بيري يالتاق آياقين كنده باسماميش اه‌للي دفه فيريلداييب.
ائله ممي دانيشا دانيشا اؤزومله دوشونوردوم بو مميه نه گليبمي؟ حسي كيم اولا ممينين يئرين دوتا؟ ممي ايل‌لردير فيريلدايير، بو حسي نه فيريلداييب‌مي كي مميني بئله چاشديريب؟ بئله‌سيندن سؤروشدوم:
- فيريلداقچي ممي، بو حسي كيم اولا سنه يئتيشه؟ هله ايل‌لر گره‌كليدير قاچا سنين بالاجا بارماقين اولا. منه دئي گؤروم نه فيريلداييب‌مي؟
ممي : - اوره‌گيمه اه‌ل ويرما، اوره‌گيم يارادير. سوروشما مندن.
يولون اه‌يدي، سوزوله سوزوله كندين دار كوچه‌لرينه گئديب گؤرونولمه‌دي.
****************
مندن سوروشارسيز نئجه اولدي بو ممي فيريلداقچي اولدي. سيزه سويله‌مليم ايلك گونلر ممي كندده گله‌نده يئكه يئكه سؤز دانيشماقلا تانيليندي. سؤزلري شيرين، اوره‌گه ياتان، بئله يئكه‌سيندن ايدي كي كندين كوتله‌سي او سؤزلره اينانيرديلار. زامان كئشديكجه كندين جاماعاتي اونو تانيدي، بيلديلر كي ممينين سؤزلري كوتله‌ني چاشديرير ممي سؤزو ايله اولاري فيرلادير، ممينين يوزدن دؤقسان دؤقوز سؤزو فيريلداماقدير. ايلك گونلر اولارا آجيق گلسئيديده گئديكجه آداملارا ممينين سؤزلري گولدوروجو گليردي. ائله او واخدان بري اونا فيريلداقچي آد وئرديلر. مميده بو آددان خوشو گلدي.
ايندي قالميشام بو حسي كيم اولا، نه يئكه يئكه سؤز دئميش اولا كي جاماعات مميه يوخ اونا فيريلداقچي دئيرلر؟
@};-@};-@};-
اوروجلوق بايرامينيز قوتلو اولسون.
بو بايرام بئله بايرامدير كي موسلماني كافري، اوروج دوتاني دوتماياني شنليك ائدير، شادلانير. بو بايرامي هاممي بايرام دوتور.
دونن كتده، قونشولاريميزدان بايرامي منه قوتلولوق دينلدي، آغزي چاخير اييي وئره وئره سويله‌دي:
بو بايرام چوخ موباره بايرامدي، يئرين بوش يولداشلارايلا يغيلميشديق توي دوتدوق، اويناييب يئديك ايشديك. يئرين بوش ايدي.
ايسته ديم بئلسينه ديه‌م: "گئت اه‌شي بيزيم يئريمز بئله‌نچي تويلار اولا بيلمز" اوره‌گيمده اؤزومله دئديم : "بوشلا بوني ائله قوي اؤزي ايله بو عزيز بايرامدا خوش اولسون، منده ائله اؤز بيلديكلريمله خوش اولوم."