هانسي "بيز" ؟
وئبلاگچی : خــــزراوغلي
+0 به يه ن
بو يازيني " اولكر اوجقار " وئبلاگيندان بورايا كؤچورتموشم.
http://ucqar.blogfa.com/post-155.aspx
هانسي بيز
الجزيره 1830- 1962 فرانساليلارين الينده اولدوغوندان دولايي اؤزو اوچون فرانسا ديل‌لي بير ادبيات و حتي فلسفه گليشديردي. بو ادبيات و فلسفه واختي ايله فرانسانين اؤز ادبياتينا بير طفيلي كيمي آلينيردي. بو طفيلي بير ياندان "تجاوز ديلي"ني يئنيدن اوره‌ديردي (بازتوليد ائديردي) بير ياندان ايسه بو ادبياتين ايچينده اؤز سؤزونو دئمه‌يه باشلاميشدي. بوردا منه هرنه دن ماراقلي "بيز" كلمه سينين آنلام دييشمهلريدير. ايلك ايللرده الجزيره لي فرانسيزجا "بيز" يازميردي و "او" عوضلييندن فايدالانيردي. بو ادبيات گوجلنديكجه و آسيميله نسيل‌لر تؤرنديكجه الجزيره‌لي "بيز" دئينده اؤزونو فرانسالي ايله بير توتوردو آنجاق بو "بيز" كلمه‌سينده اووروپالي و ... بير تيپي دوشونوردو. يعني استعمارچيني نورمال "بيز" كيمي دوشونوب، اؤزونو اونون يانيندا بير طفيلي اولاراق نظرده توتوب اونون نفعينه حذف ائديردي. يعني اؤزونون فرقلي كيمليگيندن گؤز اؤتوردو.
اونوتماياق كي، الجزيره‌لي اوشاقلار اوزون زامان فرانسالي اوشاقلارين درس كتابلاريني مدرسه لرده اوخويوردولار و البته همين تاريخي و او تاريخده "بيزيم اجداديميز گلووالار..." كيمي جمله‌لر ده آز دئييلدي. بو دورومون گولونجلوگو اوردا اؤزونو گؤسترر كي، بيلك گولووا ساري گؤي گؤز بير سويا اشاره ائتمكده دير. سؤزونو ائتديييميز آسيميله "بيز" عيني تصويري عكس ائديردي و او "بيز"ي قوللانان اوشاقلار طبيعي كي بو معيارلارا اويماديقلارينين فرقينده دئييلديلر يا بيلينج‌آلتلاريندا اؤزلريني بو فرقلنمك اوچون سوچلاييرديلار، آنجاق او يئكه "بيز" استاندارد و گوجلو يئرينده دورموشدو. سون اون ايل‌ليكلرده (1940) بو " بيز" گئت گئده د‌ييشمگه ساري گئتدي.
"بيز" دئينده "فرانسالي" بيزدن فرقلنيب همين اؤلكه ده عربجه يازيلان "بيز"ه ياخينلاشيردي. بوردا "فرانساليلار بيزه ..." كيمي جمله لرين سايي آرتماقدا ايدي و يئنيجه تؤرنن "بيز" اؤزونو فرانسالي‌نين قيوميتيندن چيخاريب اونو سوچلاماغا باشلاميشدي و حتي باشقا "بيز"لر ايله اؤرتوشمكده ايدي: "بيز عربلر"، "بيز قارالار"، "بيز آفريقاليلار" كيمي ترمينلر چوخالماقدا ايديلر آنجاق هله الجزيره نين ضياليلاري فرانسيزجا يازيرديلار و بو بيزلرين هاميسي هله بو ديلده دوغولوردو و بيلدييميز كيمي سون زامانلاردا باشقا بير "بيز" بو اؤلكه ده باش قالديردي. بو فرانسيزجاني ياخشي بيليب آنجاق عربجه يازان ضيالي طبقه‌نين "بيز"ي ايدي و پوست‌كولونيال ( سؤمورگه سونراسي يا پسااستعماري) ادبيات بوردان باش قالديرماغا باشلاييب بو سورغولاري جاوابلاماغا چاليشدي: بو قدر اؤزوموزه فرانساليلارين گؤزونده باخديقدان سونرا نئجه اؤز گؤزوموزله باخابيلريك؟
ايران توركلرينين اينديكي دورومونو الجزيره ايله توتوشدورماق چوخلو دليل‌لره گؤره يئرسيزدير، نقدر دالييا قاييديريق كيمليييميز اولدوقجا عربلر و تاتلار (فارسلار)ينكي ايله قاريشيقدير. ديوان لغات‌التركده كي " باشسيز بؤرك اولماز، تاتسيز تورك اولماز سؤزونو" خاطيرلاساق بيلريك نئجه بوردان اؤز "بيز"يميزي چيخارتماق چتين و زامان آپاراندير. آيريجا الجزيره‌لي ايله فرانساليني قايناتسان بئله قاريشمازلار حال بو كي، بيز سوي و فيزيونومي باخيميندان چوخ دا سئچيلميريك. الجزيره نين مستقل بير جغرافيادا يئر آلديغي اونون بللي معنوي سينيرلارا مالك اولماسينا سبب اولوردو اويسا بيزده توركلرين بؤيوك بير جغرافيادا تاتلارلا ايچ-ايچه ياشامالارينا شاهيديك.
بونلارين يانيندا نئچه نئچه سببدن ده دانيشماق اولار. آنجاق من ديل باخيميندان اؤز "بيز"يميزي يوخاريداكي بيزلر ايله توتوشدورا بيلرم.
- مدرسه كتابلاريندا "تركان وحشي به ايران كوچيدند" سؤزونه راستلانديغيميزدا نئچه ميز اؤزوموزو او آن ايراندا بيليب حئييف‌سيلنيميشيك؟
- نئچه‌ميز ايسه - آخي بيز نييه بورا كؤچوب گلديك دئيه دوشونموشوك؟
- ايندي فارسجا متنلرده "ما" يازاندا كيملري دئييريك؟ توركجه يازاندا كيملري؟
نظره گلير:
1. فارسجا يازديغيميز "ما"لارين قاباغيندا توركجه يازديغيميز "بيز"لرسرعتله آرتماقداير.
2. فارسجا يازديغيميز "ما"لاردا دا ياواش ياواش " ما و فارسها" كيمي مناسبتلر يارانماقدادير و فارسين ياني سيرا ايكينجي بير "ما"دان سؤز ائتمك اولور.
3. توركجه يارانان "بيز" چوخ زامانلار "بيز ايراندا ياشايان آذربايجانليلار"، "بيز آذربايجانليلار (قوزيئلي-گونئيلي)"، "بيز ايران توركلري" يا "بيز توركلر" كيمي كيمليكلري افاده ائدير.