شعرين قارتالي
وئبلاگچی : خــــزراوغلي
+0 به يه ن
قايناق : بو قوشمالاري "ائل نيسگيلي" وئبلاگيندان "سيد احسان" يازاري، بو وئبلاگا كؤچورتموشم. http://duzgun.arzublog.com/
دكتر حسين محمدزاده صديقين شعرلري سربست شعرلر
ذرّه تك آللاها چاتماق آرزوسيله
شعله چكدين،
«ذات حيدر» دن سؤز ائتدين،
گؤردۆن انوارين حقين.
سن السته باغلانيب،
قالوُا بَلي‌دن دم ووروب،
آلدين اقرارين حقين.
عارفِ آيات حق سن،
عاشق ديدارِ حق،
همتي! اي محرم اسرار حق!
كايناته ائيله‌دين اظهار سرّ لَم يَزَل،
مصطفا (ص) و مرتضي (ع) اولادينا،
هر ايكي عالمده، الله
يار ائتسين ذاتيني.
«عارضين فردوس بيللم
گؤزلرين كوثر اونون.»
سؤيله‌ييب، اول شه مردان، عليّ مرتضي، (ع)
مصطفي دردانه‌‌سي
حيدر كرّار، امام هَلْ اَتي -
وصفي ايله باشلادين ديواني‌نين باشلانغيجين.
عشق اولسون، همتي! اولادينا،
ذكر خئيرين ائيله‌ييب،
توپلانتي قورموشلار سنه.
سن شهيدلر مۆلكۆنۆن تقوا يايان مدّاحي‌سان،
هيدجيلر، سهرورديلر دياريندان گلن فريادسان.
باش اگير دۆنيا سنين قارشيندا مينلر دفعه،
باخ!
تاپمادي قبرين اگر مستشرق يئنگي جهان،
آنمادي، ذكر ائتمه‌دي ادوارد،
ريپكا، سندن هئچ،
گل گؤر اولادين بوگۆن،
قرآنين بايراغي يۆكسلميش دياردا،
ياد ائدير حؤرمتله سندن
باش اگيرلر
دۆنيالار تقوا - فضيلتله دولو،
اينجيلر ايله جوشان
دريا كيمي ديوانينا.
من ده بير شاعير كيمي
افتخار ايله آدين چكديم بوگۆن
اي درين مضمونلو شعرين قارتالي
همتي!
بوگۆن صاحب چيخان وارميش سنه.
غئيرت ايله، عشق ايله
ياد ائدير اوولاد سني.
همتي!
سن ده احسن سؤيله،
اولادين عجب همّت ائدير...
زنگان لوحه‌لري - ص 41 .
---------------
منيم ديليم بؤيۆك بير-
خزينه‌نين شاه كيليدي،
كئچميشيمدن گلن سس،
گله‌جگين اۆميدي.
مدني ميراثلارين-
قايناغيدير تۆركۆمۆز،
حكمت فضالاريندا-
اوچان چالاغانلارين
جايناغيدير تۆركۆمۆز.
گؤي تۆرك الفبا‌‌سيدير،
اويغور يازيلاري.
اونون وارليغيندادير-
سۆمرلرين آچاري.
اودوركي من ديليمه: عتيقي‌لر
خونه‌جيلر دئييرم،
همتي‌لر هيده‌جيلر دئييرم.
دۆنيايا حكمت يايان
سهروردي، ميانه‌جي دئييرم.
اثير الدين، عز الدين،
نظام الدين، حلّي‌لر،
آوه‌جيلر دئييرم.
باياتيلار، لايلالار،
قوشماجالار ديليدير
بو قاراقوشلو ديليم.
بايلار، باياتلار ديلي
اوغوزلار، مادلار ديلي،
بؤيۆك آدلار ديليدير،
منيم بو تۆركۆ ديليم.
هر شه‌هره، هر ائوه
هر بير كنده دئييرم،
ديليمه سلطانيه، خدابنده دئييرم.
قورولان كرباسيه،
خاقانيه دئييرم.
غربه، شرقه سسلنن زنگانيه دئييرم.
سن نه دئسن، دۀ گيلن
من بو ديله:
نسيميلر، واقيفلر، فضوليلر دئييرم.
علم اوجاغين يانديران،
حلوليلر دئييرم.
بسته‌نگار، هئيراتي،
چارگاه، سه‌گاه دئييرم،
آنالارين قلبينده
درين بير آه دئييرم.
حؤكۆمه بيلوريلر،
ثبوتي، شهيديلر،
منزويلر دئييرم.
پير تۆركستان آدلي،
باياتلي خواجه احمد يسويلر دئييرم.
اي اوجالاردان اوجا،
قورقودلاردان‌دا قوجا!
اون مين ايلليك تاريخين،
جانلي شاهيدي ديليم!
فولكلوروم، ترانه‌م،
نغمه‌م، آتا سؤزلريم،
عشقيمين درياسي‌نين
تكي، واحيدي ديليم!
منيم زنگانلي ديليم!
آذربايجانلي ديليم!
بؤيۆك ايمانلي ديليم!
ديلي قرآنيي ديليم!
يادا سن سينه گردين،
مني بو دينه چكدين.
اي منيم الله ايله راز و نيازيم ديليم
دينيمي دؤرد بوجاغا،
سره‌ن سرافراز ديليم!
سن منيم وجدانيمسان،
داماريمدا قانيمسان!
بو ديله عزّت، عصمت، شرف، غئيرت دئييرم،
اؤز ديليمه عدالت، اوجا همّت دئييرم.
حيثيتيم‌دير منيم،
ائليم، يوردوم، وطنيم.
بو ديلده دانيشاندا
ابهر، خرمدره‌لي،
سلطانيه، قئيدارلي
هيده‌جلي، مايان شانلي
زنگانلي آدلانيرام.
بو ديل ايله گۆلۆرم،
آليشيرام يانيرام،
درين مضمونلو سؤزۆ
من بو ديلده قانيرام.
ايندي لاپ گؤزۆن چيخسين
بورادا،
تۆركۆ ديلده
اوخويورام، يازيرام.
انسانليغا خور باخان،
مني ديل‌‌سيز ايسته‌ين،
دين‌‌سيز شوونيستلرين،
مزاريني قازيرام.
يالنيز الله اؤنۆنده، حق قارشيسيندا اگيل
وور اوغلوم قوي قالخماسين،
شوونيست، انسان دگيل.
جوكلارا معروض قويما،
تاريخ آدلانان ديلي.
بادا وئره‌رسن اويان
يۆز ميليونلوق بير ائلي.
سنه علمين قاپي‌‌سين،
آچان آچاردير بو ديل.
ظۆلمتلي قيش گئجه‌‌سي،
چيچك‌لنن، گۆل‌لنن،
بير ايلك باهاردير بو ديل.
سيجيللين، كيمليگيندير،
اوغلونو اجدادينا،
باغلايان ايليگيندير،
بو شيرين تۆركۆ ديلين.
شرف عنوانلي ديله
سن گۆوه‌ن، قوي سنه‌ده
گۆوه‌نسين شانلي ائلين.
زنگان لوحه‌لري - ص 33 – 1377.
-------------------
باخ!
بشر تاريخي آنلاتميش منه
هانسي خلقين كيم ديلي اؤلمۆش، زوالا اوغراميش،
وارليغي گئتميش او خلقين، ابتهالا اوغراميش.
ديل اؤلرسه،
آچ گؤزۆن باخ تاريخه،
خلق اؤلر، ملّت اؤلر.
هيدجيلر، شاه ختاييلر، نسيميلر اؤلۆبلر يۆز كره،
دۆشمه‌‌سين ديلدن ديلين،
اؤلمه‌‌سين شانلي ائلين...
انقلاب اوغلو، شجاعت نسلي‌سن،
شاهلاري، جلادلاري سن ازميسن،
قويما قالسين شاهچيلار مفكوره‌‌سي بو مُلك‌ده.
ملّي ظۆلمۆن توزلارين سيل
ملّتي جانلي جسدلي قويلايانلاري تاني
قويما گئتسين زنگاني.
سن كور اوغلو نسلي‌سن قلبينده‌كي عصيان هاني؟
اگمه آغزين، دۆشمنه قارشي آغارتما ديشلرين.
جنگي چال، جنگي اوخو،
ولوله سال دۆشمنين اركانينا
تۆرك‌سن، غئيرت كاني
ملّتي جانلي جسدلي قويلايانلاري تاني
قويما گئتسين زنگاني ...
زنگان لوحه‌لري - ص 26 – 1351.
------------------
كؤنلۆمۆن ماجراسي،
بير قاشقايي انساني‌نين اؤز كئچميشيدير: [1]
دوداقلاري تيكيلميش،
چيچكلري سولوب تؤكۆلمۆش،
باشي اكيلميش،
دارا چكيلميش،
ايگيد ائل اوغوللاري‌نين ماجراسيدير.
من نه‌دن قورخاجاغام؟
مني مينلر دفعه گولـلـله‌دي دۆشمن.
قانيم آخدي يئره،
يئرده قاينادي.
ديله‌گيمي توپراقلارا تاپشيردي وطن.
توپراغين رنگي،
عاشورا ظُهري كيمي،
قيپ- قيرميزي اولدو.
منيم قانيم جوشاندا
سئل اولوب آشيب داشدي،
داغلار بير - بيره ياناشدي،
دميرلر قايناشدي،
يئره لعنت ياغديردي.
من عاشورا اوغلويام!
علي اصغر قاني داملا- داملا ديليمه آخدي.
دولو بولودلاردا،
- حيرانليقلا -
گؤيلردن چاغلايان ائليمه باخدي،
آغلايان ائليمه باخدي.
دۆنيانين ان مكّار تۆلكۆسۆ
- انگليزلري -
قاودوم يوردومدان ...
قانيم شمشيره غلبه چالاندا،
دۆشمنين جايناغيندان -
توپراغيمي آلاندا،
ياد ائديرديم او گۆنلري:
آلتميش مين قاشقايي آتلي‌‌سيني،
صولت اولدوله‌ني...
من بوغدوم وطنه گيره‌ن دۆشمني،
قورتارديم ايتلردن، گؤزه‌ل وطني.
سن نه‌ين [2] كي بوغا بيلميه‌م سني؟
گمي‌مين ايچينده گمي‌چي‌ام من
يوخسا گؤزلريمي چيخارديران سن؟ [3]
يئيه بيلميه‌جه‌ين!
بو،
خيال پيلوودور!
قاشقايي لوحه‌لري - ص 24 – 1378.
-------------------------
قاشقايي واردير
مادام كي تۆركجه‌‌سي واردير.
تۆركجه‌‌سي ياشايار
قاشقايي ياشايانا كيمي.
تۆركجه ائليندير،
ائل‌ده تۆركجه‌نين.
بيري - بيريندن آيريلماز گۆل - بۆلبۆل كيمي،
بودا بير ديلدير مينلر ديل كيمي.
ائله ياشاماق حقّي وئرميش،
ائل‌ده اونو ياشاتميش.
قاشقايي ايله بيرليكده ديلي وار،
ديلي ايله بيرليكده بير وطني وار
ايران آدلي.
بودا بير وطندير مينلر وطن كيمي.
ائل‌‌سيز وطن،
وطن‌‌سيزده ائل،
معناسيز اولار.
چۆنكۆ وطن
ائله ياشاماق حقّي وئرميش،
ائل‌ده اونو ياشاتميش.
ائل ايله بيرليكده تۆركجه‌‌سي وار،
تۆركجه ايله بيرليكده بير وطن وار.
وطن ايله بيرليكده بير اولوس[1] وار،
اوزون اوزادي بير اولوس.
دۆنيانين هاراسيندان باشلار هاراسينا قده‌ر،
آلتايلاردان قيبچاقلارا قده‌ر
بير اولوس كي،
ائله ياشاماق حقّي وئرميش،
ائل‌ده اونو ياشاتميش.
ائل ايله بيرليكده بير اولوس وار،
اولوس ايله بيرليكده بيرده ديني وار
بير ميليارد انسانين كؤيۆلۆنۆ الان دين،
ائلين، تۆركجه‌نين، وطنين، اولوسون ديني.
ائله ياشاماق حقّي وئره‌ن
ديليمي ، ائليمي، وطنيمي، اولوسومو، سئومگي اؤيردن دين
كؤتۆگۆمۆ، كؤكۆمۆ، ريشه‌مي سئوديرن دين.
مدينه‌دن، مكّه دن، كربلادان گلن دين.
بو منيم كؤكۆمدۆر، كؤتۆگۆمدۆر.
ديليمدير، وطنيمدير.
ائليمدير، اولوسومدور.
كئچميشيمدن گلن سسدير
گله‌جگيمه وئرديگيم نفسدير.
سس‌‌سيز، نفس‌‌سيز اولماميش دينيم،
منيم اسلام دينيم.
قاشقايي لوحه‌لري - ص 37 – 1380.