شورباليق !!
وئبلاگچی : خــــزراوغلي
+0 به يه ن
شورباليق !!
ياني نه؟
بيلميرم ئـءءءءءءءء !!!! بيلميرم باليقي شــور ائلئـيب‌لر يوخسا شوربانــــي "ليق". آنجاق شورباليقديدا.
محلميزين موللاسي دئميشدي: "آقام ايمام حسينه(ع) نه واقت آغلاساز ثاوابدي. اودونيادا جنت يئريزدي".
ولي كيشي گونده اوروج دوتاردي. ديردي: "حيف اولسون هئي، اولسئيدي عاشورا ايله فيطر گونلرينده‌ده اوروج دوتاق داها ياخشي اولاردي. آنجاق حيف!"
دوننلري آغشام نامازي قورتاراندان سونرا مسجيدن ائوه قايداندا ولي مني گؤردي دئدي:
- آي لوتو صمدباخ موللا آقا مسجيدده آقام ايمام حسينه(ع) آغلاماغي بويوراندان چوخدانيدي ايستئيرديم ائوده آقا ايمام حسينه(ع) هيئت سالام اولموردي، ائله ايندي بو جومعا شاعبان ياريسي ناهاردان سونرا ائوده ايروضه خوانليق سالميشام. سنده گل.
ايستديم بئله‌سينه ديه‌م: " اشي شاعبان ياريسي ايمام زمام(ع) ولادتيدي، ايروضه خوانليق اولماز" زئينيمه گلدي آقانين سؤزي مسجيدده نه دئميشدي. سؤز دئمكدن واز كئچديم. بئله‌سينه سويله‌ديم :
- ولي كيشي آلله ايسته‌سه ايش اولمادان گلرم. ايش قاباقا گلسه باغيشلارساندا.
- ياخشي. ايش اولمادان گؤزلييم سني.
ولي كيشيدن آيريلديم. ولي‌نين دووار قونشوسو ممي، اكبر اوغلونو گؤردوم. گلدي قاباقا دئدي:
- لوتو صمد، بو آي موباره آيدي. شاعبان ياريسي آقا ايمام زمانين(ع) دوغوم گونودو، ائوده بئلسينه توي (جشن) دوتوموشوق. چايدان يئميشدن شيرنيدن وئره‌جيك. سنده اوشاغلارينان گل، گؤزلئيرم.
اه‌شي دونيايا باخئ! بير ائوده ياس قونشولوقوندا توي. ايكيسينه‌ده چاغريلميشيق. ايندي من نه ائديم؟
ائله باليقچينين قاباقيندان كئچئيديم تقي باليقچيني گؤردوم دوكانين آغزيندا . مني چاغيردي دئدي:
- لوتو صمد اوزون‌بورون باليغي گتيرميشم گل آل.
گئتديم ايچري بئلسينه دئديم :
- هاني.
- بوداها، باخ نه اه‌تي وار! گل آپار شيشه چك گؤر نه دادلي اه‌تي وار.
باليغين اه‌تينه دريسينه باخديم دئديم:
- اشي بو اوزون‌بورون باليغي دوور. بو كوسه باليغيدير.
- نه فرقي وار ائله بير جينسدن‌ديلر. ائله دادليدي كي گل گؤر.
- يوخ من كوسه باليغين اه‌تيني آلميرام.
ائله بوني دئديم ماغازادان ائشيگه چيخديم. اؤزوم اؤزومله دئينديم: "اوزون‌بورون حرامليقدا هردم اه‌ليميزه يئتيشيردي هردم يئيرديك، حلال اولاندان بيانا ميثقاليدا گؤزوموزه ساتاشمئيب. نه بيليم كوسه‌دي ندي ائله بو تاپيلير، اونودا بابالارين باهاسينا ساتيرلار خالقا."
ائله اؤزومله دوشونوردوم كئچميشلردن. بير زامان بيريسي اؤزون‌بورون باليغيني يئسئيدي بو جاماعات اوني حرام اه‌تي يئمك آدي ايله شاللاقلئيرديلار. ايندي هئچ تاپيلمير يئمه‌يه. ائله بير زامان چاليب اويناماق حاراميدي ايندي هر يئرده بئله چاليب اوينايرلار گل گؤر.
شوربالاماق بو جاماعاتين پيشه‌سيدي. دونه‌نه‌جان چالماق حاراميدي، اينديسه هره‌سي اؤزلرينه بير مايكل اولوبلار.
ائوه يئتيشديم. اوشاقلار قاباقا چيخيب ياخامدان اه‌ل چكمدن دئديلر:
- بابا بابا، گئدك ائشيگه بو زادلاردان آل بيزه !
سوروشدوم : نمه‌نه؟
قونشونون اوشاقلاري بئله‌لرينه سويله‌ميشديلر يئميشلي دوندورما ايله كاكائولو شيره سيني قاريشيق . دئديم:
- ياخچي من اؤزوم سيزه دوزلدرم.
ائوده باشلاديم بو يئمگي دوزلتميه، قاباقجادان دوندورما آليب ائوده ساخلاميشديق. كاكائو ايله هرنه اه‌ليمه چاتدي قاريشديرديم. گل گؤر نه چيخدي. قاريشيق دوزلو كاكائولي تورشو ناباتلا دوندورما. لاپ زيقا اوخشاييردي. ائله اؤزومده نه ائلئيرم ييه بيلميرم. اوره‌ييم قاريشير. اؤزدن ايراق قوسماقيم گلير.
ائله بئله‌ده دوشونوردوم جوما گونو شاعبان ياريسنين ولي ايله ممي‌نين توي ياسلارينا.