Insanliq

دورنانيوز – سرويس توركي – تاريخي و فرهنگي : ۱۸۱۳ جو ايلده روسيه ايله ايران آراسيندا ايمضالانميش گولوستان صلح موقاويله سيندن سونرا دا بو دؤولت لرين آراسينداكي موناسيبت لر گرگين اولاراق قاليردي. هر ايكي دؤولت گيزلي جه موحاريبه يه حاضيرلاشير و بو مقصدله سرحد بؤلگه سينده ياشئيان دؤيوشكن روح لو قاراپاپاق لاري اؤز طرف لرينه چكمك اوچون اللريندن گلني اسيرگه ميردي. روس تاريخي قايناق لاري و رسمي يازيشمالار ايران حاكميتي نين قاراپاپاق لاري تابع لي يينده كي ايروان خانليغينا و ديگر بؤلگه لره كؤچمك اوچون هر بير واسيطه يه ال آتديقلاريني، روسلارين ايسه هر بير وجه له بونون قارشيسيني آلماغا چاليشديقلاريني ثوبوت ائدير.
روسلارين جنوبي قافقازداكي پيادا ديويزيالاريندان بيريني كومانداني پولكوونيك كنياز ل.ي. سئوارساميدزه ژنرال-ليتنانت آ.آ. ويليامين اووا ۱۸۲۶- جي ايل، ۴ يانواردا (ژانويه نين ۴ جو گونو) قاراكليسه كنديندن يازديغي ۴ سايلي رپورتوندا دئيردي: «ايلك نؤوبه ده آشاغيداكي لاري ذاتي- عاليلرينيزه چاتديرماغا لازيم بيليرم. ايران لي لارين اونلار طرفه كئچن گورجوستان ساكين لري ني نه مقصدله گؤيچه و دره چيچك ده مسكون لاشديرديقلاري ، اؤز طرف لرينه كئچن لرين سايني آرتيرماق نامينه اونلاري مكافات لانديرديقلاري و عزيزله ديك لري سيزه معلوم دور. آغاالارين هامي سي نا كندلر وئرديلر. بوتون گليرلري نين هامي سي نين اونلارين اؤزلرينده قالاجاق لاريني و گورجوستان دان گيتره بيله جك لري باشقا عائيله لرين- ده تابع ليك لرينه وئريلمه لري ني تأمين ائتديلر. من گؤرورم كي ايران حوكومتي اونلارا چوخ ديقت يئتيرير، تئز تئز هديه لر وئرير بونونلادا بيزيم ديستانسيلاردا ياشايان قئيري- خريستي يانلاري اؤز طرف لرينه چئويرمه يي باجارير.
من ده اونلارين ايرانلي لارلا آرالاريني وورماق اوچون بوتون ايمكانلاردان ايستيفاده ائتديم و بير قدر بونا نائيل اولابيلديم. ايندي بعضي آغالار يازدا بيز طرفه كئچيب پمبك و دلي جان دا (ديلجان دا) مسكونلاشماق ايسته يير. آنجاق اونلار اؤزلري ايله گتيره جك لري عائيله لرين اوّل كي آغالارين قايتاريلماماسي يعني ايروان خانليغيندا اولدوغوكيمي اؤز تابع ليك ليينده قالماسي شرطيني ايره لي سورورلر. حساب ائديرم كي اونلارين شرطيني قبول ائتمك لازم دير. اگر بؤيوك ساتان آغاجلا- دلي جان آراسينداكي «هون» آدلانان اراضي مسكونلاشماق اوچون اونلارا وئرسك، اوندا ايرانين تبعه لي يين ده اونلارين چوخ آز بير حيصه سي قالار و بوندان بيز خيئيردن باشقا زيان گؤرمه ريك. زامان كئچديكجه بو عائيله لر تاتار ديستانسيالارينا : شمش الديل (شمس الدين) ، قازاق و بورچالي يا اؤز قوهوملاري نين يانينا داغيلاجاق.
ذاتي- عالي لري . اونودا نظري نيزه چاتديريم كي، اونلارين سايي ايكي مين عائيله دن چوخدور و گورجوستان اوچون بؤيوك زيان ، ايران اوچونسه هئچ ده كيچيك اولمايان آرخا-كؤمك ديرلر. يالنيز بوفاكت اونلاري قليقلاماغيميز اوچون يئترلي دير». سئوارساميدزده ويليامين اووا ۱۸۲۶ جي ايل ۱۲ فئورال دا يازديغي باشقا بير راپورتوندا ايروان سرداري نين قاراپاپاق آغالاريندان گؤيچه ده مسكونلاشميش ناغي خان و دره چيچك ده مسكون لاشميش ايسماعيل آغا ايله گؤروشدويونو ، ۱۴ ايون ۱۸۲۶ جي ايل ۴۰۱ لي راپورتوندا ايسه قاراپاپاق و گؤيچه آتلي لاري نين باليق چاي ياخين ليغيندا توپلانديغي ني بيلديرير.
بئله ليك له اوزون مودّت لي سياسي گرگين ليكدن سونرا، ايران شاهي فتحعلي شاهين بؤيوك اوغلو و وليعهدي عاباس ميرزه قاجار اينگيل تره نين (اينگليسين ) تحريكي ايله گولوستان موقاويله سيني پوزاراق، موحاريبه اعلان ائتمه دن ۱۸۲۶ جي ايل ۱۶ ايول دا ۶۰ مين ليك قوشون لا قاراباغا هجوم ائتدي.
روس لارين سرحدده كي حربي حيصه لريني دارماداغين ائدن قاجار قوشون لاري ۲۶ ايول دا، شوشا قالاسيني موحاصيريه آلديلار. عاباس ميرزه نين اساس مقصدي تيفليسين اله كئچيريلمه سي ايدي. بونا گؤره ده اونون قوشون لاري نين بير حيصه سي شوشاني موحاصيره ده ساخلادي، قالانلاري ايسه تيفليسه دوغرو حركت ائتدي.
روس باش كومانداني ژنرال آ.پ. يئرمولوف بورچالي، قازاخ و شمش الديل ايستانسيالاري نين ساكين لرينه ۱۸۲۶ جي ايل ۲۶ ايول دا موراجيعت ائدرك دئييردكي: «بيليرسينيزكي، ايرانلي لار سرحدي كئچيپ قاراباغا گريب…. سيزي شيرنيك لشديريب وطن دن اوزاق لارا، ايرانا كؤچورمك ايسته يه جك لر. دميرچي حاسانلي لارين چوخو خوراساندان گئري كؤچوب ، اونلاردان سوروشسانيز اورادا نئجه پيس يئرلرده ياشاديقلاريني سؤيله يه جك لر.»
عاباس ميرزانين گونئي قافقاز اراضي سينه داخيل اولماسي بوراداكي خان و به ي لري (بيگلري) آياغا قالديردي. ايروان خاني حسين قولوخانين قارداشي، ساري آسلان آدي ايله تانينان مشهور حسن خان ، شيرك و پمبه يه هوجوم ائتدي. قازاخ، شمش الديل و بورچالي دا قيام لار باش وئردي، بورچالي نين بؤيوك آلمان كولوني ياسي يئكاترين فيلده (اينديكي بولنيس شهري) هجوم ائديل دي، نتيجه ده كولونوليست لردن اؤلن لر و اسير آلينان لار اولدو. قالانلار ايسه تيفليس اطرافينداكي مارينفيلد كولوني سييا سينا و آلمان لار ياشايان ديگر ياشايئش منطقه لري نه سه په لنديلر. روس لار اوردو اوچون يئرلي تورك لردن عيبارت سواري ميليس لر ياراتماغا باشلاديلار. بورچالي قاراپاپاق لاري تيفليسه اوز توتوب موافيق مسئول دايره لرده اوردويا آتلي ميليس لر وئره بيلمه يه جك لريني ديله گتيرديلر.
اؤز قووّه لريني روسيه دن گلميش يئني قوشونلارلا او جومله دن دكابريست لرين عوصيانيندا ايشتيراك ائتديك لرينه گؤره قافقازا سورگون ائديلميش قوارديا حيصه لري ايله آرتيران روس لار عكس هوجوما كئچديلر. ۲۵ ايول دا پودپولكوفنيك سيمونيچ كومانداني اولدوغو قافقاز گرناديور پولكونون (سئچمه عسگر آلايينين) ۴ روتاسي (بؤلويو) و ۴ توپ لا تيفليس دن شمكير ايستيقامتينه حركت ائتدي. يول بويو اونلارا پوست لاري، يئني گؤزتچي موقع لري توتان دون كازاك لاري دا قوشولدو. گراف سيمونيچ – ين خاطيره لريندن: «۲۵ ايول دا بيز سوغانليغي ترك ائتديك… من دميرچي حاسانليدا دايانديم. آرخادا قالانلار گئجه بويو گليب بيزه چاتديلار و چاي دا چيميب سرين لنديلر. بورادا بير گون لوك استراحت ائتمه لي اولدوق. بو گئنيش دوزن ليك ده يوروش زماني بيز هئچ بير اينسانا راست گلمه ديك. ياي اولدوغو اوچون داغلارا اوزاقلاشميش به ي لردن هئچ بيري منيم له گؤروشمك و اؤز خيدمت لريني تكليف ائتمك اوچون آرانا ائنمه يي لازيم بيلمه دي. بويئرلرده قيامين باشلانماسينا دايير معلوماتسيزليغيما باخماياراق ، بو پيس اشاره ايدي. يالنيز كاپيتان شنيت نيكوف دان اؤيرنديم كي شمش الديل ديستانسيياسي آچيق آيدين، بيزه قارشي عوصيان ائدير. بونا گؤره ده چلدير دره سي ني توتماق اوچون داغ لارا طرف حركت ائتمك باره ده هئچ دوشونمه يه دَيميردي. من توووز كندينه قائيتديم. شنيت نيكوفون كولونياسي ايسه تيفليسه يولا دوشدو … تيفليسي ترك ائتديييم گوندن منيم دسته مين گوجو ۲۰۰ كازاكين حسابينا چوخالميشدي…
«تاتار» ديستانسييالارينداكي عوصيان لاري گراف سيمونيچ يئرمولوفون واخت سيز اينظيباطي ايصلاحات لاري ايله ايضاح ائديردي. او يازيردي: «گورجو چارلاري زامانيندا تاتار ديستانسييالاريندا ايداره چي و يا موراو (ايداره چي) وظيفه لري كنياز فاميالارينا عاييد ايدي و ايرسن اؤتورولوردو. ژنرال يئرمولوفون سلف لري قايدالاري ده ييشميردي. قاريشيقليق و حربي تهلوكه واختي نفوذلو فاميليا لارين يارديمي اونلارا تابع اولماغا آليشميش اهالي يي ساكيت ليك ده ساخلاماق اوچون ضروري ايدي. ۱۸۲۷ جي ايلين مارت آييندا يئرمولوفون يئرينه قافقاز جانشيني وظيفه سينه چارا صاديق ژنرال ي.ف. پاسكويچ تعيين ائديلدي.
۱۸۲۷-جي ايلين يازين دا پاسكويچين رهبرلي يي ايله روس اوردوسو ايروانا حركت ائتمه يه باشلادي. بو تاريخ بويو روسلارين ايروانا اوچونجو يوروشويدو. ايروان حربي يوروشون مقصدي عاباس ميرزه نين گونئي قاققازداكي سونونجو بؤيوك داياق نوقطه سي اولان ايروان قالاسي نين ايشغالي و روس حؤكمرانليغي ني آراز چايي نا قدر اوزاتماق ايدي. روسيه حه له چارل الكساندرين حؤكمرانليغي واختيندان كور- آراز خطّي ني ايران لا سرحد زولاغينا چئويرمه يه چاليشيردي.
يوروشدن قاباق روسلار محاريبه نين باشلانغيجيندا باش وئرميش عوصياندان عيبارت درسي گؤتوره رك موعيّن احتياط تدبيرلري گؤرموشدولر. قافقاز جانشيني نين بورچالي باش پريستاوي نا ۱۸۲۷ جي ايل ۲۲ مارت گؤستريشي له بورچالي آغا- به ي لري موحاريبه ايله ايلگيلي تيفليسه اؤز اوشاقلاريندان آمانات لار گؤندرميشديلر «تيفليسس كيه وئدوموستي» قزئتي ۱۸۲۸-جي ايل ده يازيردي: «حربي قوبرناتور، ژنرال آديوتانت ن.م. سيپاگين تيفليس ده آمانات لار اوچون مكتب تأسيس ائتدي. ايندي بورادا ايسلام قانون لاريني، حسابي، روس و تاتار ديل لريني اؤيره نن ۳۲ موسلمان شاگيرد تحصيل آلير».
آوريل آييندا روس قوشون لاري نين ژنرال ن. بنكندورفون رهبرلييي آلتينداكي آوانكارد (اؤنجول) دسته لري پمپك دن ايروان خانليغي نين اراضي سينه گيردي. ۸ ايون دا پاسكويچين اساسي قووّه لري جلال اوغلي – حاماملي – اشترك يولوايله اچمي يدزينه (اوچ كيلسه يه) چاتدي.
روس اوردوسونا ايره لي له مه ده اساس مانعي شاهين قوشونلاري ده ييل، كؤچري تورك طايفالاري ياراديردي. منبع لر تصديق له ييركي، ايروان يوروشو زماني و عموميت له بوتون موحاريبه بويونجا روسلارا ان چوخ زيان يئتيرن طايفا قاراپاپاقلارايدي . تاريخچي، ژنرال و. پوتتو يازيردي: «روس اوردوسونون گليشينه قدر ايروان ويلاتين ده ۲۰ – يه ياخين تاتار طايفاسي حيات سوروردو. بوتون بو طايفالاردان جيدّي اهميت كسب ائدن يئني دوشمن تشكيل اولونوردو. خصوصي له قاراپاپاق لار نظره آلينماماسي قئيري- مومكن اولان دوشمن لر ايديلر…
اونلار ايچري سينده قئيري-عادي ايگيدلر واردي. اونلارين قانادلاري آلتينا اؤزلري كيمي قوچاق لار يئغيني آخيشيب گليردي و اونلار چوخ تهلوكه لي اولا بيليرديلر. روس قوشونلاري نين اونلارا ياخين ويلايت لره داخيل اولماسي اونلار اوچون اولدوقجا خوش گلمزايدي». پوتتو داها سونرا يازديقلارينا قاراپاپاق لارين بو محاريبه ده ناغي خان و ايسماعيل آغانين باشچي ليغيندا موستقيل حركت ائتمه يه حاضيرلاشديقلاريني علاوه ائدير.
۱۴ ماي دا روس پولكوف نيكي قوركو آرازين ساغ ساحيلنده چوخ سايلي آلاچيق لار گؤرور. جاسوس لوق ائدن ارمني لر خبر گتيرديلركي بو آلاچيقلاري قاراپاپاق ناغي خان قوروب باش كوماندان ژنرال. ل. پاسكويچين بونون لا باغلي گراف نس سل رودا گؤندردييي رسمي مكتوبوندان بعضي سطيرلري نظري نيزه چاتديريرق : «ايروان ويلاتيندن ۱۰۰ قاراپاپاق عائيله سي توركييه يه كئچدي. باشقا قاراپاپاق لار (۸۰۰ عائيله) اؤز دوشرگه لري ني آرازين او تاييندا ساليب لار و ناغي خان ايله ايسماعيل آغانين رهبرلي يي آلتيندا اونلارين ان ياخشي مينيجي لري حسن خانا خيدمت ائدير. رئيس لري ايسكندرخان ۹ ماي دا بيزيم له وروش دا اؤلدورلموش چوبان كره لي لر (۲۰ عائيله) ده اونلارلادير…
قاراپاپاق خلقي آراسيندا اطراف ويلايت لرين هاميسيندا اوغورلو قاچاقچيليق لا شؤهرتلنميش چوخ جسور اينسان لار وار.»
قاراپاپاق لارين آنتي روس فعاليتي پاسكويچ اوردوسو تركيبينده ايروان يوروشونه قاتيلان مشهور روس ديپلوماتي و يازيچي سي آ.س. گريبويدوفون (۱۸۲۹-۱۷۹۵) يول قيدلرينده ده نظره چارپير. ۲۰-۱۹ ماي قيدي : «قاراپاپاق لار تورك سرحدينه كؤچوب لر. بيزيم نوماينده لري اله كئچيريب اؤلدورورلر. اونلاري اورادان نئجه سيخيشديرماق اولار؟»
گراف پاسكويچ شادلي لار طايفاسي نين رهبري، ۲۰ عصرين ايكينجي اون ايلليينده وئدي باسار ماحاليندا ارمني-داشناك ايشغالچي لارينا قارشي موباريزه آپارميش خالق قهرماني عاباس قولو به ي شادلينسكي نين اولو باباسي آسلان بيننتالي سولطان اوغلو ايله گؤروشمك تشببوثونده بولونور. «او (پاسكويچ-ف.و) وئدي باساردا مسكونلاشان اولدوقجا دؤيوشكن، اييلمز قاراپاپاق لار طايفاسي آراسيندا آسلان سولطانين بؤيوك نوفوذ صاحيبي اولدوغونو بيلير. اونون واسيطه سي له قاراپاپاقلاري يولا گتيرمك ايسته ييردي.» آسلان سولطان ۲۰۰ شادلي و ۱۰ قاراپاپاق آغ ساققاللي ايله اچمييدزينده باسكويچ له گؤروشوب روسلارين تبعه لييني قبول ائدير. پاسكويچين يازديغينا گؤره بو قاراپاپاقلارين اوزلريندن روسلارا ايطاعت دن چوخ اعتيبارسيزليق آچيق اوخونوردو.
آسلان سولطانين روس حيمايه دارليغيني قبول ائتمه سي موعين نتيجه لر وئرمه يه باشلادي و پوتتو: «شادلي لاردان ۶۰ نفر سيلاح لاريني آتيب سردار آباد دان قاچدي. ناغي خانين ان ياخشي آتلي لاريندان اولان ۵۰ قاراپاپاق اونو ترك ائديب گؤيچه يه قاييتدي. آنجاق بو حه له كي آيري جا ايستيثنالار ايدي. تاتار طايفالاريني داها تهلوكه سيز ائتمك اوچون موافيق تدبيرلر حياتا كئچيرمك لازيم گليردي. بئله تدبيرلردن داها مقصده اويغونو اونلارلا دينج موناسيبتين ياراديلماسي ايدي. روس طرفينه كئچميش تاتارلارين سايي آز اولسادا، اوميد ائتمك اولاردي كي باشقالاريدا اونلارين يولونو سئچه جك لر». پاسكويچ شادلي لاردان بير نئچه سيني قاراپاپاق لارلا علاقه ياراتماق و اونلاردان مال-پارا آلماق اوچون داغلارا گؤندرير.
البته كي، باش كوماندانين اساس مقصدي قاراپاپاقلارلا تيجارت علاقه سينين ياراديلماسي دئيلدي. او گراف نسسلرودا عونوان لاريني مكتوب دا آچيق لاييردي كي اساس مقصد ۳۰ وئرست آرالي داكي داشينمالاري گؤيچه سمتيندن «حسن خان طرفده دؤيوشن سويداشلاري كيمي قاچاقچيليق لا نفس آلان اوراداكي قاراپاپاق آتلي لاري طرفيندن ناراحات ائديلمه مه سيندن عيبارت ايدي» و پوتتو گؤيچه قاراپاپاق لاري حاققيندا يازيردي: «ايرانلي لارين اؤزلري ده اونلاري كؤچمه يه تحريك ائتميردي. چونكو بيليرديلركي داغلاردا قالماقلادا قاراپاپاق لار اونلار اوچون لازيم ايشلر گؤره جك لر. علا آت سورن لر . آنجاق تنبل اكينچي لركيمي اونلار روس لارين ارزاق لا تأمينينه هئچ بير كؤمك ائده بيلمزديلر، عكسينه روسلارين عكسينه چئوريلمك له هر بير كئچيدده، هر بير طرفدن روس دسته لرينه زيان وورا بيلرديلر».
ژنرال پاسكويچين گؤردويو تدبيرلر اؤز موثبت نتيجه لريني وئريردي. بئله كي، آ.س. گريبويدوفون خاطيره لريندن و پوتتونون بو موحاريبه باره ده يازديقلاريندان آيدين اولوركي، حسن خانين ۹ ايون دا ناغي خانين رهبرليينده كي قاراپاپاق لارلا روس داشينمالارينا هوجوم ائتمك، «اود و قيلينج لا گومرودون جلال اوغلو و باش كئچيد واسيطه سي له زال قايا كئچمك نيّتيني.» باسكويچين اچمييدزينه گليشي و درحال اطراف لارداكي تورك طايفا لاري ايله آپارديقلاري دانيشقلاري پوزموشدور.
روسلار ايونون اورتاسيندا ايروان قالاسيني موحاصيريه آليب هجوم ائتسه لرده هئج بير نتيجه يه نائيل اولا بيلمه ديلر. پاسكويچ ژنرال كراسووسكي نين ۲۰ – جي پياده ديويزياسينا قالانين موحاصيره سيني داوام ائتديرمه يي تاپشيردي . اؤزو ايسه اساس قووّه لري ايله گرني چايا دوغرو ايستقامت گؤتوردو. چونكو عابّاس ميرزه قوشونو آرازين ساغ ساحيلينده جمعلشديردي و روسلارلا اساس دؤيوش ساحيلده كي عابّاس ميرزه قوشونونو آرازين ساغ قالاسيندا قبول ائتمه يي پلانلاشديردي . « پاسكويچ گرني چايا حركت ائمه ميشدن قاباق قاراپاپاق خالقينين گؤيچه ده ياشايان حيصه سي ايله يئني علاقه لر ياراتدي .
اونا معلوم اويدوكي قاراپاپاقلار آراسيندا ناغي خان دان سونرا اؤز عاغلي و مردلييي داها چوخ آرازين بوتايينداكي داغلاردا قالميش ممّد آغا تانينير. پاسكويچ ممد آغاايله سيخ علاقه لر ياراتماغا چاليشدي . بو مقصدله او پوروچيك كورقان اوفو ۳ گورجو زادگاني ايله داغلارا گؤندردي .
شادلي سولطاني اؤز قارداشيني و اوغلونو دوشرگه ده گيروو قوياراق اونلارين تهلوكه سيزليينه جاواب ده اولدو» . كورقانوفون ايلكين دانيشيقلاري چوخ اوغورلو اولور. روسلار قاراپاپاقلارلا آرالاريني دوزلدييني سانيب هئچ ندن چكيلمه دن حركت ائدرك ۱۹ ايوندا گرني چايا چاتير. بو واخت روس دوشرگه سينده گؤزله نيل مز خبر يايئليركي ، قاراپاپاقلار ئيني دن روس لارا قارشي آياغا قالخيب كورقانوف لا اونو موشايعت ائدن گورجولري اسير گؤتوروبلر و حسن خان اونلارين دعوتي له داغلارلا آلاگؤزدن گؤيچه يه كئچيب. اسير گؤتورولن لر تئزليك له آزاد اولونور و قاراپاپاق لار ساكيت له شيرلر. حسن خانين گؤيچه يه گلمه سي خبري ايسه دوغرو ده ييلدي .
«۹۰۰ عائيله روس تبعه لييني قبول ائتدي . ۱۵۰ قاراپاپاق آتلي سي پاسكويچه تقديم اولونماق اوچون داغلاردان ائندي اونلارين آراسيندا باش كوماندانين روس لار طرفه چكمه يه چوخ چاليشيديغي ممدآغادا واريدي. پاسكويچ اوراداجا اونو كؤچه به لرين وكيلي، يعني رئيسي تعيين ائتدي . بئله ليك له طايفانين ياريسي روسيانين باريشماز دوشمني ناغي خان دان آيريلدي .
۲۱ ايون دا، آرتيق ساكيت ليك ياراناندان سونرا روس اوردوسونون يولو آچيق ايدي، قوشون بيرلشمه لري نهايت كي ، گرني چاي دان ناخچيوانا حركته كئچدي» . آ. قريبويدوف ممدآغا ايله بيرليك ده پاسكويچين حضورونا گلميش قاراپاپاق لار آراسيندا پمبك لي هومّت آغانين اولدوغونودا قيد ائديردي .
۱۸۲۷- جي ايل ۲۱ ايون دا حاماملي ياخين ليغينداكي باش آباران دوزونده جلال اوغلودان اچمييدزينه گئدن روس دسته سي ايله باش وئرميش توققوشمادا ناغي خانين اوغلو اؤلدورولدو . پاسكويچين اوردوسو وئدي چايي و د وه لي ني كئچيب ۲۶ ايوندان ناخچيوانا گيردي . قانلي دؤيوش لردن سونرا روسلار ۷ ايول دا عاباس آباد قالاسيني اله كئچيرديلر. بو مغلوبيّت نتيجه سينده عابّاس ميرزا روسلارا صولح دانيشيقلاري آپارماغي تكليف ائتدي . بو تكليفي پاسكويچ قبول ائتدي و بونون اوچون شاهزاده نين قاراضياء الدين ده كي دوشر گه سينه آ. قريبويدوفو گؤندردي. منبع لردن معلوم اولوركي ، ۲۱ ايول دا باشلانميش دانيشيقلاردا عاباس ميرزه ايله ياناشي اونون اساس اعيان لاري آللاه يار خان ، علي نقي ميرزا، قاراپاپاق لارين باشچي سي ناغي خان و روسلارلا ايسته ني لن ياخين لاشمانين قطعي عليه داري حسن خان ساري آسلان دا ايشتيراك ائديردي . عاباس ميرزا گريبوبدوفون ايروان و ناخچيوان خانليق لارينين روسيايا وئريلمه سي و ايرانين تضمينات اؤده مه سي تكليفيني ردّ ائتدي. بير نئچه گون داوام ائدن صولح دانيشيقلاري نتيجه سيز قالدي. قريبويدوف ۱۵ ايول دا پاسكويچين يانينا قايئتدي .
حربي عمليات لار يئني دن قيزيشدي . عاباس ميرزا آغري داغ – سورمه لي ايستيقامتيندن ايروانا دوغرو ايره لي له مه يه باشلادي. او گورجو سهراب خاني ۲ باتاليون عسگر و ۲ توپ لا هوجوم مقصدي له اچمييدزينه گؤندردي . اؤزو ايسه اساس قووّه لري ايله آواران لا اوزبه اوزده كي داغ دا موقع توتدو. سهراب خان اچمييدزيني موحاصيره يه آلدي . اچمييدزين ده كي ۵۰۰ عسگر ليك روس قارني زونو آلاگؤز داغي نين اته يينده كي ژنرال كراسووسكي دن يارديم ايسته دي. كراسووسكي ۴۰۰۰ عسگر و ۴ توپ لا يارديما تله سي دي . بونو ائشيدن عاباس ميرزه نين بوتون سواري قوشون لاريني اچمييدزينه گئدن يولون كناريندا يئرلشديردي .ژنرال كراسو وسكي نين گونده ليين ده كي ۱۰ آگوست ۱۸۲۷ – جي ايل تاريخلي قئيد دن : « بو گون من قارابابادان ، ژنرال گراف سوخته لي نين ۲ آگوست دا يازديغي و گؤندردي يي آشاغيداكي مضمون لو بيلديريشي آلديم :
۱)ايروان سرداري حسين قولوخان ايران حوكومتيندن اوز چئوريب و اؤز عائيله سيني و وار – دؤولتي ني ايروان و ماكو قالالاريندان گؤتوروب بير نئچه يوز قاراپاپاق عائيله سي له كوراوغلو قالاسينا گئديب .
۲) عاباس ميرزه بو معلوماتي آلان كيمي ، آللاه يارخانين رهبرلي يي ايله ۳۰۰۰ سربازي و ناغي خانين باشچي ليغي آلتيندا ۲۰۰۰ سواري ني ، بو سونونجويا حسن خانين اقامت گاهيني رد ائدره ك ايروان قالاسيني توتماق اوچون يوللادي .
۳-دئييرلركي، حسن خان چارچي دا عاباس ميرزه نين جيدي قارووولو آلتيندادي.
بوجو معلومات لار هر بير حقيقت دن اوزاق اولسادا، اوردو منزيل قرار گاهيندا عاباس ميرزه نين اؤزونون اساس قووّه لري ايله ايروان ايالتينده منيم قارشيمدا اولدوغو حاققيندا هئچ نه بيلمه ديك لرينين بارز ثوبوتويدو».
۱۷ آگوست دا اچمييدزين و اوشاقان يولو اوستونده كراسووسكي نين دسته سي ايله ايرانلي لار آراسيندا دهشت لي دؤيوش اولدو . ژنرال كراسووسكي يارالاندي . عاباس ميرزه اسيرلري شاهين يانينا گؤنده ريب خوي شهرينه طرف يوللاندي.
۱۹- جو عصرين سالنامه چي لريندن اولان ميرزه يوسف نرسوسوف قاراباغي فارس جا يازديغي « تاريخ – صافي» اثرينده كراسووسكي نين دسته سينده اولان قاراپاپاق سواري لري ايله عاباس ميرزه نين آتلي لاري آراسينداكي دؤيوشو بئله تصوير ائديردي « قازاخ ، بورچالي و قاراپاپاق آتلي لاريندان عيبارت روس قوشون لاريني دؤوره يه آلميش قيزيل باشلار ووروش ماغا باشلاديلار . اوگون گوجلو مورحاييه و ووروشما اولدو. اوگون گوندوز ساعات ايكي دن گون باتاناكيمي توپ و توفنگين آتشي هريئري بوروموشدو داوا و موحاريبه ئين اودو ايسه آلوولانيردي . هرايكي طرف قوربان وئرمكدن چكينميردي.
روس لار (روس اوردوسون داكي قاراپاپاق لار – ف . و.) اطرافيندا قيزيل باش آتلي لاري نين گوج گلدييني حيس ائتديك ده ، آرابالاري ماهود و باشقا شئيلرله دولدوروب اورادا قوياراق اؤزلري قاباغا گئتديلر. قيزيل باش قوشونو آرابالاردا خزينه و يا پارچا اولدوغونو ظن ائديب، غارت له مشغول اولدولار . بوواخت روس لار توپ لارين سئچمه ايله دولدوروب اونلارين اوستونه آتديلار. بئله ليك له، قيزيل باشلارين چوخو محو اولدو».
بو موحاريبه ده قاجار تورك لري ايله دؤيوش لرده گؤسترديك لري ايگيدليك لره گؤره بير نئچه بورچالي قاراپاپاغي مداللارلا تلطيف اولوندو. اونلارين آراسيندا بولوس – كپنك چي لي ممد آغا عابدوللا آغا اوغلودا واريدي.
سپتامبرين اول لرينده پاسكويچين اوردوسو اچمييدزينه چاتدي ، ۲۰ سپتامبردا سردارآبادي توتدو . ۲۴ سپتامبردا ۴۰ توپ لا ايروانا هوجوم ائتدي. ايروانين مودافيعه سينه حسن خان رهبر ليك ائديردي . بير هفته داوام ائدن شيددت لي دؤيوش لردن سونرا ۱۸۲۷ – جي اكتبرون ۱- ده روس قوشون لاري ايروان قالاسيني ايشغال ائتدي . ايرواني آلديغينا گؤره ژنرال پاسكويچه « گراف اريوانسكي» تيتولو وئريلدي.
۱۸۲۷- جي ايلين سونو ۱۸۲۸ – جي ايلين اول لرينده روس لارين بير – بيرني آردينجا تبريز، خوي، اورميه، سلماس ، اردبيل شهرلريني ايشغال ائديب تهرانا يؤنلمه سي عاباس ميرزه ني صولحا وادار ائتدي . ۱۸۲۸ – جي ايل ۱۰ فئوريه ده تبريز – تهران يولو اوزه رينده يئرله شن توركمنچاي كندينده ايروان و ناخچيوان خانليق لاري اراضي لري نين روسيايا وئريلمه سي، ايرانين ۲۰ ميليون روبل تضمينات اؤده مه سي و ايران داكي ارمني لرين قاراباغ و ايروان ماحالينا كؤچورلمه سي ايله نتيجه له نن صولح موقايله سي ايمضالاندي . توركمن چاي سازيشيدن سونرا ، يعني آراز چايي ايران و روسيا آراسيندا سرحده چئوريليك دن سونرا موحاريبه عرضه سينده ايروان خانليغي نا و قاراباغا كؤچن و عاباس ميرزه نين قوشونوندا اولان قاراپاپاق لارين اكثريتي گونئي آذربايجانا يئرلشمك مجبوريّتينده قالديلار . عاباس ميرزايا ايلده ۱۲۰۰۰ تومن و گره كن ده ۴۰۰ آتلي عسگر وئرمك شرطي ايله آرپالي، سارال، تركاوون ، جان احمدلي، چاخارلي و اولاش لي كيمي ۶ اوروقدان عيبارت اولان ۸۰۰ قاراپاپاق عائيله سي ناغي خانين بؤيوك اوغلو مهدي خانين رهبرلي يي آلتيندا اورميه گؤلونون جنوب ساحيل لرينده – سولدوز ماحاليندا مسكونلاشدي. « بو اوروق لار ايچينده ان گوج لو و سايقيني تركاوون لري ايدي . خان سولاله سي اساس بو عائيله ده كي آغا عائيله سي نين ده سايقين بير يئري اولوب ، آراز آغانين ۸۰۰ آتلي سي واريدي . قازاخلي لارين شمس الدين لي اوروغو ايسه رئيس لري معصوم به يين (بيگين) اؤندرليينده سولدوزون جنوب – شرقينه پناه آپارديلار». يئني يوردو قولوخان بورچالي ايداره ائديردي .
قايناق : قاراپاپاقلار درگي سي – گورجستان
يازار : فخري واله اوغلو – گورجستان قاراپاپاقلاريندان
كؤچورن : اسفنديار سپهري نيا
قايناقلار :

۱٫ М. Е. Коцебу. Описание вторжения персиян в Грузию в ۱۸۲۶-ом году. Материалы к истории персидской войны ۱۸۲۶-۱۸۲۸ годах, с. ۲۶-۲۷٫
۲٫ AKAK, VI cild, I hissə, Tiflis, 1874, s. 717.
3. AKAK, VII c., Tiflis, 1878, s. 334.
4. M. E. Kotsebu, göstərilən əsəri, s. 10-3.
5. «Tiflisskie vedomosti», ۱۸۲۸, ۱۹ sentyabr (¹ ۱۲).
۶٫ В. Потто. Кавказская война в отдельных очерках, эпизодах, легендах и биографиях, том III, Персидская война ۱۸۲۶-۱۸۲۸ г., вып. ۲, СПб, ۱۸۸۷, с.۳۳۴-۳۳۵٫
۷٫ AKAK, VIII c., II h., s. 548
8. Polnoe sobranie soçineniy A.S.Qriboedova, t.I, SPb, 1889, s.111.
9. Ə. Ələkbərli. Abbasqulu bəy Şadlinski, Bakı, ۱۹۹۶, s. 32.
10. AKAK, VIII c., II h., s.548.
11. Qarabağnamələr, II kitab, Bakı, ۱۹۹۱, s. 88.
12. V. Hacılar. Ulu baban kim olub?, I kitab, Bolus-Kəpənəkçi kəndi – XIX yüzil, Tiflis, 2005, s. 56.
13. O. Yeniaras, göstərilən əsəri, s. 52.